जनकपुरधाम । मधेस प्रदेशमा म्यादी प्रहरीमा भर्नाको लागि पहिलो दिनमै साढे आठ हजार आवेदन परेको छ ।
बिहीबार साँझसम्म मधेस प्रदेशको सबै जिल्लामा गरी आठ हजार चारसय १३ जनाले म्यादी प्रहरी भर्नाको लागि आवेदन दिएका छन् ।
दुई हजार दुईसय ९७ महिला र छ हजार एकसय १६ जना पुरुषले पहिलो दिन आवेदन दिएको प्रदेश प्रहरी कार्यालय जनकपुरधामका प्रवक्ता सुमनकुमार तिम्सिनाले जानकारी दिए ।
उनका अनुसार प्रदेशमा सबैभन्दा बढी सप्तरीमा आवेदन परेको छ । सप्तरीमा एक हजार एकसय ६८ पुरुष र चार सय ३५ महिला गरी १६ सय तीन जनाले आवेदन दिएका छन् ।
यस्तै, सबैभन्दा कम आवेदन पर्सामा परेको छ । पर्सामा दुईसय २९ महिला र चारसय ६३ पुरुष गरी छ सय ९२ जनाले आवेदन दिएका छन् ।
सर्लाहीमा पुरुष एक हजार ६३ र महिला तीनसय ५९ जनाले आवेदन दिएको प्रहरी उपरीक्षक तथा प्रवक्ता तिम्सिनाले जानकारी दिए ।
सिरहामा तीनसय ७५ महिला र सातसय १९ पुरुष गरी एक हजार ९४ जनाको आवेदन परेको छ ।
धनुषामा आठसय २२ पुरुष र दुईसय ६२ महिला गरी एक हजार ८४ आवेदन परेको छ ।
महोत्तरीमा पाँचसय २५ पुरुष र दुईसय ६० महिला गरी सात सय ८५ वटा आवेदन परेको छ ।
यस्तै, रौतहटमा सबैभन्दा कम महिलाले आवेदन दिएका छन् । रौतहटमा एकसय ३६ महिला र आठसय ७० पुरुष गरी एक हजार छ जनाको आवेदन परेको छ ।
बारामा दुईसय ४२ महिला र चारसय ८६ पुरुषको आवेदन परेको छ ।
बिहीबारदेखि जिल्ला प्रहरी कार्यालबाट आवेदन लिन सुरु गरिएकाे हाे । बिहान ६ बजेदेखि साँझ ५ बजेसम्म आवेदन बुझाउने समय तोकिएको छ । आवेदन असोज ६ गतेसम्म मात्र लिइनेछ ।
