काठमाडौं । नेपाल प्रहरीका महानिरीक्षक धीरजप्रताप सिंह संयुक्त राष्ट्रसंघको प्रधान कार्यालय न्युयोर्कमा भएको तेस्रो संयुक्त राष्ट्रसंघका प्रहरी प्रमुखको सम्मेलनमा सहभागी भई स्वदेश फर्किएका छन् । उनलाई शनिबार त्रिभुवन अन्तर्राष्ट्रिय विमानस्थलमा अतिरिक्त महानिरीक्षक तथा प्रहरी नायब महानिरीक्षकलगायत वरिष्ठ प्रहरी अधिकृतले स्वागत गरे ।

विमानस्थलमा कुराकानी गर्दै प्रहरी महानिरीक्षक सिंहले उक्त सम्मेलनमा संयुक्त राष्ट्रसंघीय शान्ति मिसनमा प्रहरीको भूमिकालाई अझ सशक्त बनाउन राष्ट्रसंघका महासचिवद्वारा जारी गरिएको साझा एजेन्डा र ‘एक्सन फर पिस किपिङ’ कार्यान्वयन गर्ने सन्दर्भमा विशेष छलफल भएको बताए ।

नेपालको तर्फबाट अन्तर्राष्ट्रिय शान्तिसुरक्षा र विकासका निमित्त स्पष्ट प्रतिबद्धता व्यक्त गरिएको उनले जानकारी दिए ।

उनले अरू देशका प्रहरी प्रमुखसँग द्विपक्षीय तथा बहुपक्षीय भेटवार्ताका क्रममा यूएन मिसनमा नेपाल प्रहरीको सहभागिता र योगदानका सम्बन्धमा चर्चा गरिएको जानकारी दिए ।

उनीसँगै सशस्त्र प्रहरी महानिरीक्षक राजु अर्याल पनि उक्त सम्मेलनमा भाग लिन अमेरिका गएका थिए । यही भदौ १५ देखि १७ गतेसम्म भएको उक्त सम्मेलनमा १८१ देशका प्रहरी प्रमुखको सहभागिता थियो । रासस