![भलिबल संघको नेतृत्वका लागि मास्के र चन्द भिड्दै](https://12khari.top/uploads/posts/niroj-maskey-jitendra-chand1662524783.jpg)
काठमाडौं । नेपाल भलिबल संघको नयाँ नेतृत्वका लागि उपाध्यक्ष निरोज मास्के र महासचिव जितेन्द्रबहादुर चन्दले प्रतिस्पर्धा गर्दै छन् । त्यसका लागि आज संघको चुनावी साधारण सभा हुँदै छ ।
काठमाडौंको बबरमहलस्थित कार्की ब्यांक्वेटमा हुने साधारणसभाले अब चार वर्षका लागि नयाँ नेतृत्व चयन गर्नेछ । उपाध्यक्ष मास्केले केहीअघि नै अध्यक्ष पदका लागि उमेदवारी घोषणा गरेकी थिइन् । चन्दले यही भदौ १९ गते अध्यक्ष पदका लागि लड्ने घोषणा गरेका हुन् ।
कोभिड–१९ महामारी र नयाँ ऐनका कारण संघको चुनाव दुई वर्ष ढिला गरी हुन लागेको हो । चन्दको समूहबाट हालका सदस्य रोशन श्रेष्ठले महासचिवमा उमेदवारी घोषणा गरेका छन् ।
भदौ ९ गते महासविचमा उमेदवारी घोषणा गरेका हालका सचिव मनवीर छन्त्यालले मास्केलाई सघाउने बताएका छन् । त्यसकारण मास्के र छन्त्यालको टिम बनेको छ । चन्दलाई श्रेष्ठको साथ छ । छन्त्याल ढोरपाटन क्लबका संस्थापक हुन् । श्रेष्ठ भोजपुरबाट प्रतिनिधित्व गर्छन् ।
![Global Ime bank](https://baahrakhari.com/uploads/bigyaapan/30885600.gif)
संघको ३९ सदस्यीय कार्यसमितिमा २५ जना निर्वाचनबाट चुनिनेछन् । १३ मनोनीत र एकजना निवर्तमान अध्यक्षको हैसियतमा स्वतः कार्यसमितिमा रहनेछन् ।
भलिबल संघमा १३६ मतदाता रहे पनि नयाँ ऐन जारी भएसँगै राष्ट्रिय खेलकुद परिषद्को कर्मचारीका रूपमा संघमा रहेका तीनजनाले राजीनामा दिएपछि यसपल्टको निर्वाचनमा १३३ जनाले मतदान गर्नेछन् ।
७७ जिल्लाबाट ७ ७जना, सात प्रदेशबाट दुईजनाका दरले १४, कार्यसमितिका ३९ मध्ये ३६, तीन क्लब (न्यु डायमन्ड स्पोर्ट्सस, जावलाखेल भलिबल प्रशिक्षण केन्द्र र ढोरपाटन भलिबल प्रशिक्षण केन्द्र), रेफ्री कमिसनबाट एकजना, राष्ट्रिय टिमका कप्तान दुई (महिला र पुरुष) गरी १३३ जनाले मतदान गर्नेछन् ।