काठमाडौं । भारतीय क्रिकेट टिमले शनिबार १७ वर्षपछि आईसीसी ट्वान्टी–२० विश्वकपको उपाधि जित्यो । तर, विश्वकप उपाधि उचालेको केही घण्टाभित्रै भारतीय टिमका तीन दिग्गज क्रिकेटरले सन्न्यासको घोषणा गरे । 

जसमा छन्, कप्तान रोहित शर्मा, विराट कोहली र रवीन्द्र जडेजा । पहिल्लो डेढ दशकयता क्रिकेट टिमका नियमित सदस्य बनेका यी तीन खेलाडीको स्थान भर्पाइ गर्न भारतीय क्रिकेट टिम (बीसीसीआई) अहिले नयाँ अनुहारको खोजीमा छ । 

रोहित सन् २००७ देखि अर्थात् १७ वर्षदेखि भारतीय टिममा निरन्तर थिए । यस्तै, विराट कोहली १४ वर्षदेखि र रवीन्द्र१५ वर्षदेखि क्रिकेटको सानो संरचनामा राष्ट्रिय टिमको प्रतिनिधित्व गरिरहेका थिए । यी तीन खेलाडीको स्थानमा शुभमन गिल, यशस्वी जयसवाल र ऋतुराज गायकवाडले भारतीय क्रिकेट टिमको शीर्ष क्रम ब्याटिङ अर्डरमा दाबेदारी दिन सक्नेछन् । 

कप्तानको रूपमा युवा ब्याटर गिल अलराउन्डर हार्दिक पन्ड्या र विकेटकिपर ब्याटर ऋषभ पन्तसँगै दाबेदारमा छन् । कोहलीबाट सुरुआत, लगत्तै रोहित र रवीन्द्रको घोषणा शनिबार बार्बाडोसमा भएको फाइनलपछि भएको थियो । दक्षिण अफ्रिकाविरुद्ध सात रनको साँघुरो जित निकाल्दै भारतले १३ वर्षपछि आईसीसी प्रतियोगिता र १७ वर्षपछि आईसीसी ट्वान्टी–२० विश्वकपको उपाधि जितेको हो । 

त्यसको केही मिनेटपछि नै वर्तमान पुस्ताको सबैभन्दा उत्कृष्ट ब्याटर कोहलीले सन्न्यासको घोषणा गरे । “यो भारतको लागि मेरो अन्तिम ट्वान्टी–२० खेल थियो । मेरो अन्तिम विश्वकप हो । म आफ्नो उत्कृष्ट दिन चाहन्थे । विश्वकप जित्नु हाम्रो लक्ष्य थियो । हामी विश्वकपको ट्रफी उचाल्न चाहन्थे । हामीले हारेको भए पनि मेरो निर्णय यही नै हुन्थ्यो । अब आगामी पुस्ताले जिम्मेवारी सम्हाल्ने समय आएको छ,” विश्वकपछि कोहलीले दिएको प्रतिक्रिया यस्तो थियो । 

कोहलीको प्रदर्शन प्रतियोगिताभर खास बन्न सकेको थिएन । फाइनलअघिका सात इनिङमा उनले ७५ रनमात्र बनाएका थिए । तर, फाइनलमा भने दक्षिण अफ्रिकाविरुद्ध उनले ५९ बलमा ७६ रनको उत्कृष्ट इनिङ खेले । भारतको जितमा कोहलीको यो इनिङ सबैभन्दा महत्त्वपूर्ण रह्यो । उनी फाइनल खेलको ‘प्लेयर अफ दी म्याच’ समेत चुनिए । 

कोहलीले घोषणा गरेको केही बेरमै कप्तान रोहितले पत्रकार सम्मेलनमा सन्न्यासको घोषणा गरे । “यो मेरो पनि अन्तिम खेल थियो । क्रिकेटको यो संरचनाबाट बिदा हुने योभन्दा राम्रो समय अरु हुन सक्दैन । मैले आफ्नो करिअरको सुरुआत यही संरचनाबाट गरेको थिए । म उपाधि जित्न चाहन्थे र अब सबैलाई धन्यवाद भन्न चाहन्छु,” रोहितले भनेका थिए । 

कप्तान रोहित भारतीय टिमको विश्वकप यात्रामा सबैभन्दा अघि रहे । कोहली अधिकांश समय स्वभाविक लयका लागि संघर्ष गर्दा रोहितले १५६ भन्दा माथिको स्ट्राइक रेटमा २५७ रन बनाए । उनी प्रतियोगितामा दोस्रो सबैभन्दा धेरै रन जोड्ने ब्याटर बने । रोहितले सुपर–८ मा अस्ट्रेलियाविरुद्ध र सेमिफाइनलमा इंग्ल्यान्डविरुद्ध अर्धशतक बनाएका थिए । 

विश्वकपको उपाधि जितेको अर्को दिन अलराउन्डर जडेजाले पनि सामाजिक सञ्जाल इन्स्टाग्राममार्फत सन्यासको घोषणा गरे । “कृतज्ञतासहित म ट्वान्टी–२० अन्तर्राष्ट्रिय क्रिकेटलाई अलबिदा भन्न चाहन्छु । गर्वसाथ दौडिने एक दृढ घोडाजस्तै मैले सधैँ आफ्नो देशका लागि उत्कृष्ट दिएको छु । अन्य संरचनामा पनि यस्तै गर्ने क्रम जारी राख्नेछु,” ३५ वर्षीय जडेजाले इन्स्टाग्राममा लेखेका छन् । यद्यपि, यस विश्वकपमा जडेजाको प्रदर्शन स्वभाविक बन्न भने सकेन । 

यी खेलाडी छन् दाबेदार 
रोहित शर्माको कप्तानीमा भारतले हालसम्म ६२ खेल खेलेको छ । जसमा भारतीय टिमले ४९ खेलमा जित निकाल्दा १२ खेलमा मात्र हार व्यहोरेको छ । रोहितअघिका कप्तान विराटको नेतृत्वमा भारतले ५० खेल खेल्दा ३० खेलमा जित र १६ खेलमा हार बेहोरेको थियो । 

भारतीय टिममा अब रोहितको बहिर्गमनपछि अलराउन्डर हार्दिक पन्ड्याले नेतृत्व सम्हाल्ने सम्भावना उच्च छ । यस्तै, इन्डियन प्रिमियर लिग (आईपीएल)बाट आफ्नो कप्तानी प्रमाणित गरिसकेका विकेटकिपर ब्याटर ऋषभ पन्त पनि यो सूचीमा छन् । तर, भारतले जिम्बाब्वेसँगको शृंखलाका लागि भने युवा ब्याटर शुभमन गिललाई कप्तान चुनेको छ । रोहित र कोहलीले विश्वकपको सबै खेलमा ओपनिङ गरे । अब यी दुईले एकसाथ छोड्दा शुभमन, यशस्वी जयसवाल र ऋतुराज गायकवाड यो स्थानका प्रवल दाबेदारीमा छन् ।