काठमाडौं । काठमाडौंको गोकर्णमा आइतबार (हिजो) मृत भेटिएका २४ वर्षीय युवकको हत्या भएको आफन्तले दाबी गरेका छन् । उनीहरूले घटनामा प्रहरीको भूमिका शंकास्पद रहेको पनि दाबी गरेका छन् ।

आइतबार गोकर्णमा ओखलढुंगाको चम्पादेवी गाउँपालिका–९ का २४ वर्षीय दुर्गाधन सुनुवार मृत अवस्थामा फेलापरेका थिए । मृतकका दाइ विनोद सुनुवारका अनुसार दुर्गाधन यही भदौ ७ गते मदन मेमोरियल कलेजबाट आफ्ना शैक्षिक कागजात लिन काठमाडौं आएका थिए । उनी सिभिल इन्जिनियर हुन् ।

विनोदका अनुसार भदौ ८ गते दुर्गाधनले साथीहरूसँग काठमाडौंको बौद्ध, महाँकालमा सामूहिक खानपान गरेका थिए । त्यति बेला उनीहरू ६ जना थिए । काठमाडौंको कागेश्वर मनोहरा नगरपालिका–२, आलापोटस्थित कोठामा जाने क्रममा सोही राति ११ बजे उनीहरूको भेट गोकर्णमा गस्तीमा रहेको प्रहरीसँग भएको थियो ।

सो क्रममा एकजना पक्राउ परेका थिए । पक्राउ परेका लीला गुरुङ ९ गते छुटेका थिए । तीन मोटरसाइकलमा सवार उनीहरूमध्ये पाँचजना भाग्न सफल भएका थिए ।

भागेका मध्ये दुर्गाधन आइतबार मृत फेलापरेका हुन् । प्रहरीले दुर्गाधनसहितलाई लखेटेपछि उक्त घटना भएको मृतकका दाइ विनोदको दाबी छ । घटनाबारे अर्को दिन परिवारलाई समेत जानकारी नदिएकाले प्रहरीकै भूमिका शंकास्पद रहेको उनको आरोप छ ।

उनले बाह्रखरीसँग भने, “प्रहरीले लखेटेका प्रमाण पनि हामीसँग छन् । प्रहरीले लखेटेको सीसीटीभी फुटेज पनि छ । शरीरभरि घाउ देखिन्छन् । हत्या भएको हाम्रो आशंका हो । प्रहरीमाथि पनि अनुसन्धान हुनुपर्छ भन्ने हाम्रो माग हो । तर, प्रहरीले उजुरी लिन मानेको छैन ।”

दुर्गाधनको शव महाराजगन्जस्थित त्रिवि शिक्षण अस्पतामा राखिएको छ । शवको पोस्टमार्टम हुन बाँकी छ ।

काठमाडौं प्रहरी परिसरका प्रमुख एसएसपी भरत बोहराले मदिरा सेवन गरेर सो समूहले सटरमा हान्दै हिँडेको अवस्थामा एकजनालाई पक्राउ गरिएको बताए । उनले भने, “अन्य विषय बौद्ध प्रहरीसँग जानकारी लिँदा राम्रो होला ।”

प्रहरी वृत्त बौद्धका डीएसपी हरि बस्नेतले घटनाबारे परिसर काठमाडौंका प्रवक्तालाई सोध्न आग्रह गरे ।

परिसर काठमाडौंका प्रवक्ता एसपी दिनेशराज मैनालीले घटनाबारे अनुसन्धान भइरहेको बताए । उनका अनुसार सो समूहले भदौ ८ गते राति प्रहरीमाथि नै आक्रमण गरेको थियो ।

शवको पोस्टमार्टम नभएकाले घटनाबारे केही भन्न नमिल्ने उनको भनाइ छ । उनले अनुसन्धानमा सहयोग गर्न आफन्तलाई आग्रह गरे ।

एसपी मैनालीले भने, “अनुसन्धान हुन्छ । अनुसन्धानमा दोषी भए कारबाही जो कोहीलाई पनि हुन्छ । जाहेरी दिनुपर्‍यो । प्रहरीले जाहेरी नलिने भनेको छैन । शंका लागेकै भरमा कसैमाथि किटानी जाहेरी दिनु भएन । अनुसन्धान गर्न दियो भने अरू कुरा खुल्ला ।”

मृतकका आफन्तले गोकर्ण प्रहरी बिटका इन्चार्ज रमेशप्रसाद पाण्डेसहित शंकास्पद व्यक्तिविरुद्ध किटानी जाहेरी दिन खोजेका छन् । तर, प्रहरीले किटानी जाहेरी लिन नमानेको उनीहरूको भनाइ छ । दुर्गाधनका आफन्त अहिले प्रहरी वृत्त बौद्धमा छन् ।