काठमाडौं । ‘टुबोर्ग ओपन २०२२’ मा लोकप्रिय अमेरिकी संगीतकर्मी जेसन डेरुलो जोडिएका छन् । उनीसँगै नेपालबाट उदयमान कलाकार भेक पनि जोडिएका छन् ।

‘टुबोर्ग ओपन’को हरेक वर्ष एउटा मुख्य थिम हुन्छ । यो वर्षको थिम ‘टेक द स्टेज’ भनेर छ, जसमा विश्व प्रख्यात कलाकारले उदयमान स्वदेशी कलाकारलाई मेन्टरसिप प्रदान गरी उनीहरूलाई संगीतको मूल भाव र एउटा लोकप्रिय कलाकार कसरी बन्ने भनी मार्गदर्शन गर्छन् ।

डेरुलो अमेरिकी गायक तथा गीतकार हुन् । उनले आफ्नो पहिलो एकल गीतबाटै अन्तर्राष्ट्रिय ख्याति कमाएका थिए । उनको उक्त गीत अमेरिका र न्युजिल्यान्डमा नम्बर एकमा पुग्न सफल भएको थियो । ‘जलेबी बेबी’, ‘स्वाला’, ‘स्याभेज लभ’ उनका थुप्रै हिट गीतमध्येका हुन् ।

यस्तै, भेक नेपाली सांगीतिक क्षेत्रमा पछिल्लो पुस्ताका लोकप्रिय संगीतकर्मी हुन् । उनले पनि छोटो समयमै लोभलाग्दो क्रेज कमाइसकेका छन् । उनका चर्चित गीतहरूमा ‘एक्लै जिउन सिकेँ’, ‘मायालु’, ‘लै बरी लै’ हुन् ।

संगीत क्षेत्रको उत्थानका लागि काम गर्दै आइरहेको टुबोर्गले विगत पाँच वर्षदेखि टुबोर्ग ओपेन क्याम्पेनद्वारा निरन्तर कैयौँ राष्ट्रिय तथा अन्तर्राष्ट्रिय कलाकारहरूलाई एउटै प्लेटफर्ममा उभ्याउँदै आएको छ । टुबोर्गले नेपालमा मात्र नभई भारत, चीन, टर्की, सर्भियालगायत देशहरूमा पनि टुबोर्ग ओपेन क्याम्पेन गर्दै आएको छ । यसैअन्तर्गत ‘टुबोर्ग ओपन’ विदेशमा छैटौँपटक र नेपालमा पाँचौँपटक हुँदै छ ।

विदेशको छैटौँ ‘टुबोर्ग ओपन २०२२’ अमेरिकामा सम्पन्न भइसकेको छ । गएको महिना डेरुलोसँग अमेरिकाको लस एन्जलसमा भेकले मेन्टरसिप प्राप्त गरी नेपाल फर्किसकेका छन् । यो वर्षका लागि भेकले आफ्नो मेन्टरसिपद्वारा सिकेका ज्ञानहरूले एउटा नयाँ गीत बनाउँदै छन्, त्यो आउँदो केही महिनामा सार्वजनिक हुँदै छ ।