रुकुम पूर्व । रुकुम पूर्वको पुथा उत्तरगंगा गाउँपालिका–११, तल्लो सेरामा भएको प्रहरीको भ्यान दुर्घटनामा परी घाइते भएका सबैलाई हेलिकोप्टरमार्फत नेपालगन्ज लगिएको छ ।

सुर्खेतबाट आएको नेपाली सेनाको हेलिकोप्टरमार्फत सशस्त्र प्रहरीका प्रहरी नायब उपरीक्षक रवीन्द्र श्रेष्ठ, नेपाल प्रहरीका प्रहरी नायब उपरीक्षक प्रकाश डाँगी, चालक प्रहरी हवल्दार कुमारसिंह डाँगी, प्रहरी जवान सन्तोष बुढामगर र इन्द्र घर्तीलाई थप उपचारका लागि कोहलपुर मेडिकल कलेज लगिएको प्रहरीले जनाएको छ ।

पहिलो चरणमा सशस्त्र प्रहरीका प्रनाउ श्रेष्ठसहित चालक प्रहरी हवल्दार डाँगी, प्रहरी जवान बुढामगरलाई नेपालगन्ज लगिएको थियो । दोस्रो चरणमा नेपाल प्रहरीका प्रनाउ डाँगी र प्रहरी जवान घर्तीलाई नेपालगन्ज लगिएको हो ।

अर्का प्रहरी जवान लक्ष्मण पुनलाई पनि नेपालगन्ज लगिएको थियो । उनलाई त्यहाँ लैजानेबित्तिकै अस्पतालले मृत घोषणा गरेको प्रहरीले जनाएको छ ।

अहिले प्रनाउ डाँगीको शिक्षण अस्पताल बाँके र सशस्त्र प्रहरीका प्रनाउ श्रेष्ठको सशस्त्र प्रहरी बल अस्पताल नौबास्ता, बाँकेमा उपचार भइरहेको छ । अरू घाइतेको कोहलपुर मेडिकल कलेजमा उपचार भइरहेको छ ।

आज जिल्ला सदरमुकाम रुकुमकोटबाट पुथा उत्तरगंगा गाउँपालिकाको तकसेरातर्फ जाँदै गरेको नेपाल प्रहरीको भ्यान तल्लो सेरा गाउँनजिकै दुर्घटना भएको थियो । गाडी सडकबाट करिब १०० मिटर तल खसेको बताइएको छ । रासस