काठमाडौं । नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले समाज परिवर्तनको जिम्मेवारी कम्युनिस्टको काँधमा रहेको बताएका छन् । शनिबार काठमाडौंमा पुष्पलाल जन्मशताब्दी समारोहमा उनले यस्तो बताएका हुन् ।

उनले नेपाली विशेषताको समाजवादका कार्यक्रम नेकपा (एकीकृत समाजवादी)ले ल्याउन लागेको जिकिर गरे । कम्युनिस्टले पहल गर्दा नेपाली राजनीतिमा ठूलठूलो परिवर्तन भएको भन्दै उनले सबै मिलेर विचारविमर्श गर्न आवश्यक रहेकामा जोड दिए ।

उनले नेपालको कम्युनिस्ट आन्दोलनमा उतारचढाव, उकालीओराली, एकता, विघटन भइरहे पनि आत्तिनुपर्ने अवस्था नरहेको बताए । वर्तमान परिस्थितिमा गम्भीर हुनुपर्ने आवश्यक रहेको उनको भनाइ थियो ।

उनले नेपालको राजनीतिमा कम्युनिस्ट आन्दोलनले महत्त्वपूर्ण भूमिका खेलेको टिप्पणी गरे । गणतन्त्रलाई समाजवादी गणतन्त्रमा रूपान्तरण गर्न आवश्यक रहेकामा उनले जोड दिए ।

उक्त कार्यक्रममा माधव नेपालको भनाइ पढ्नोस्–
नेपालको कम्युनिस्ट आन्दोलन आज उतारचढाव, उकालीओराली, एकता, फेरि विघटन, फेरि पुनर्गठन, विभाजन, फेरि पुनः एकता यही प्रक्रियामा अघि बढिरहेको छ । अहिलेको अवस्था हेरेर हामी धेरै चिन्तित हुनु हुँदैन । तर, गम्भीर हुनुपर्ने आवश्यकता छ । कम्युनिस्टहरूले पहल गर्दा नेपाली राजनीतिमा ठूलोठूलो परिवर्तन ल्याएका छन् । तरंग सिर्जना गरेका छन् । अहिले पनि समाज परिवर्तनको जिम्मेवारी कम्युनिस्टहरूकै काँधमा छ । हामीले नेपाली विशेषताको समाजावादका कार्यक्रम ल्याउँदै छौँ । न्युज एजेन्सी नेपाल