लन्डन । सुपरसोनिक हवाई यात्रा सदैव समयको धारणामा अलमलिने गरेको छ । यसबारे एटलान्टिक महासागर पार गर्न सक्ने र विमान उड्नेबेला निर्धारित समय भन्दा पहिले नै अवतरण हुनसक्ने जस्ता प्रसंगहरू उठ्ने गरेका छन् । तर, विमान निर्माता कम्पनी बूम आफ्नो ओभरचर सुपरसोनिक विमानसँगै नयाँ धारणा अघि सार्न सफल भएको छ । 

हालै बेलायतको फार्नवर्ग एयर सोमा आफ्नो उत्पादनको डिजाइन सार्वजनिक गरेर बूमले घडीको सुईलाई एकचोटि पुनः साठी दशकतिर फर्काएर कन्कोर्ड विमानको सम्झना दिलाएको छ । विशाल डेल्टा पखेटा, चारवटा झुण्डिएका इन्जिन र लामो तथा पातलो फ्युजलेजले कन्कोर्डसँग यसलाई तुलना गर्न बाध्य बनाउँछन् ।  

तर, छ दशक लगाएर फ्रेन्च र बेलायती डिजाइनरहरूले विश्वमा पहिलो सुपरसोनिक एयरलाइनर सुरु गरेयता बूमले भने यस सम्बन्धमा केही सुधार ल्याउन सफल भएको छ् । परम्परागत पुच्छर भएको ओभरचरमा पखेटा अलि बंग्याइएका छन् भने ध्वनि निष्कासन प्रविधिमा पनि अलि परिमार्जन गरिएको छ । भयानक आवाजकै कारण कन्कोर्ड प्रयोगको अन्त्य भएको थियो । 

ओभरचरले पहिलो उडान आगामी सन् २०२६ मा गर्ने अपेक्षा गरिएको छ । नयाँ प्रविधिको कुरा गर्ने हो भने यसका इन्जिनहरूले सय प्रतिशत सस्टेनेवल एभिएसन फ्युल (एसएएफ) प्रयोग गर्नेछन् । 

बूम कम्पनीले ओभरचरको सुरुवातपछि न्युयोर्कदेखि लन्डन सम्मको हालको उडान समय अवधिमा दुई घन्टाले कमी हुने जनाएको छ । युनाइटेड र जापान एयरलाइन्स लगायतले बूमलाई ७० वटा ओभरचर विमानको अर्डर दिइसकेका छन् । 

रोव रिपोर्टबाट ।