काठमाडौं । गत हप्ता (साउन १७ गते) सार्वजनिक भएको तिज गीत ‘पापाकी परी’को सम्पादित भिडियो सार्वजनिक गरिएको छ । 

गीतको एउटा दृश्य र शब्दलाई लिएर आलोचना भएपछि त्यसलाई हटाएर नयाँ फुटेज र शब्द जोडेर गीतको सम्पादित भिडियो युट्युबमा अपलोड गरिएको हो ।

राष्ट्रिय लोक तथा दोहोरी प्रतिष्ठानका कार्यसमिति सदस्य र लोकसंगीतमा बढ्दै गएको विकृति शुद्धीकरण अभियानका संयोजकसमेत रहेका शिव हमालकै गीतका शब्द र दृश्यमा उच्छृङ्खलता पाइएको भन्दै व्यापक आलोचना भएको थियो । 

दर्शक र प्रतिष्ठान  दुवैले आपत्ति जनाएपछि टिमले शब्द र दृश्य हटाएको हो । 

“हजार माइलमा कहीँकतै चिप्लिन सकिन्छ र म पनि चिप्लिएँ होला । कस्तो कस्तो लोकगीतहरू सहजै स्वीकार भइरहेको छ । तर मेरो गीतका शब्दहरू त्यतिधेरै आपत्तिजनक थिएन,” रचनाकार हमाल भन्छन्, “सायद म प्रतिष्ठानसँग जोडिएको भएर पनि यतिधेरै विरोध भयो होला । ठिकै छ, मैले सिर्जना गर्ने भनेको दर्शकका लागि हो । यदि दर्शकले नै आपत्ति जनाउनुहुन्छ भने मैले त्यसलाई सच्याउनैपर्छ । त्यसैले हामीले टिमसँग छलफल गरेर उक्त दृश्य र शब्द नै हटाएर सम्पादित भिडियो अपलोड गरिसकेका छौँ ।”

हमालको शब्द रहेको गीतमा सुशिला पाठक र आशिष अविरलको स्वर रहेको छ । अविरलकै नामको युट्युब च्यानलबाट रिलिज भएको गीतमा अविरलकै संगीत रहेको छ भने निर्देशन मौसम हिमालीले गरेका हुन् ।

गायिका सुशिला पाठक पनि आफ्नो गीतका शब्द र दृश्यमा कुनै अश्लीलता नभएको भन्दै धम्की आएपछि बाध्य भएर विवादित दृश्य र शब्द हटाएको बताउँछिन् । 

आइतबार आफ्नो आधिकारिक फेसबुकमा नयाँ सम्पादित भिडियोको लिङ सेयर गर्दै उनी लेख्छिन्, “गीतकारलाई धम्कीपूर्ण आदेश संस्थाबाट आएको र मलाई पनि स्वयं धम्की आएले गीतकारले आफ्नो पदबाट राजीनामा नै दिनुपर्ने अवस्था भएको कारणले गर्दा मात्र मैले युट्युब च्यानलबाट यो दृश्य हटाएको हो अन्यथा हाम्रो गीतको शब्द र दृश्य अश्लील भएर पक्कै पनि होइन म एकदम दुखी छु । किनभने हाम्रो शब्द र दृश्य अश्लील थिएन अश्लील बनाइयो अनि अर्को कुरा युट्युबमा तीज गीत भनेर मेन्सन पनि गरेको छैन मैले ।”