काठमाडौं । नेपालको हिमाली भेगमा छायाङ्कन भएको बलिउड चलचित्र ‘उचाइ’ को रिलिज मितिसहितको फर्स्ट लुक पोस्टर सार्वजनिक भएको छ ।

सुरज बडजात्याको निर्देशन रहेको चलचित्र नेपालको सुन्दर हिमाली भेग मनाङ, मुस्ताङ लगायत क्षेत्रमा छायाङ्कन गरिएको हो । 

आइतबार सार्वजनिक गरिएको फर्स्ट लुक पोस्टरमा चलचित्रका तीन मुख्य पात्रहरू हिमाल आरोहण गर्दै गरेको देख्न सकिन्छ । 

चलचित्रमा बलिउडका महानायक अमिताभ बच्चन, बोमन इरानी, अनुपम खेर, परिणिती चोपडा, सारिका हसन र ड्यानी डेन्जोङ्पा मुख्य भूमिकामा छन् । 

मित्रताको साहसिक यात्राको कथा बोकेको यस चलचित्र नेपालको हिमाली भेगमा छायाङ्कनका लागि मुख्य कलाकार परिणिती, बोमन, अनुपम, निर्देशक बडजात्यासहित करिब २०० जनाको टिम गत वर्षको अक्टोबरमा नेपाल आएका थिए । 

उनीहरू एक महिना नेपालमा बसेर छायाङ्कन गरेर गएका थिए । 

यस चलचित्रमा नेपाली कलाकारहरूले पनि अभिनय गर्ने मौका पाएका छन् । १६ जना नेपाली कलाकारहरूको अभिनय रहेको चलचित्रमा अन्ुपम, बोमन, अमिताभ, परिणिती र सारिकाको डमी क्यारेक्टरको रूपमा नेपाली कलाकारहरू क्रमश सरोज लामिछाने, रमेश बज्राचार्य, डेभिड तेन्जिङ शेर्पा, उरुषा जोशी र परिमिता आर एल राणाले भूमिका निभाएका हुन् । 

चलचित्र यही वर्षको नोभेम्बर ११ तारिख अर्थात् कार्तिक २५ गते रिलिज हुँदैछ ।