काठमाडौं । उद्योग, वाणिज्य तथा आपूर्तिमन्त्री दिलेन्द्रप्रसाद बडूले नेपाल आयल निगमलाई निजीकरण गर्न लागेको भनेर भ्रामक हल्ला मात्र गरिएको बताएका छन् । आइतबार प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा उनले यस्तो बताएका हुन् ।

उनले निगमलाई निजीकरण गर्न लागेको भनेर बजारमा हल्ला फैलाएर भ्रम छर्न खोजिएको जिकिर गरे ।

समिति सदस्य नरबहादुर धामीले सो विषयमा प्रश्न गरेका थिए । जवाफमा मन्त्री बडूले निराधार, तथ्यहीन र भ्रम फैलाउने उद्देश्यले बजारमा यस्ता हल्ला फैलाइएको बताए ।

सरकारले त्यस्तो खालको कुनै कदम नचालेको उनले उल्लेख गरे । उनले भने, “आधारसहित भनिदिने हो भने जवाफ दिन सजिलो हुन्थ्यो । निराधार, भ्रामक ढंगले भ्रम फैलाउने काम भयो । यो भ्रम फैलाउनेहरूको गैरजिम्मेवारी हो । उहाँहरूले जिम्मेवारीसाथ वस्तुगत ढंगले भन्दिए त्यसको निराकरण छ । त्यसकारण हल्ला भ्रामक हुन् । आधारहीन हुन् । तथ्यहीन हुन् ।”

मन्त्री बडूले निजीकरण नभई निगमलाई सुधार र ऋणमुक्त गर्नुपर्ने बताए । “निजीकरण गरिनेवाला छैन । काम गर्ने निमगले नै हो । तर, निगमभित्रको सुधार गर्नुपर्छ भन्नु गलत हो भन्नेजस्तो लाग्दैन,” उनले भने, “यसलाई कसरी हुन्छ, सुधार गरौँ । यसलाई ऋणबाट मुक्त गरौँ भनेको हो । अहिले घाटामा गहिरहेको छ । जसकारण राज्यले समेत घाटा व्यहोर्नु परिरहेको छ ।”