काठमाडौं । संस्कृति, पर्यटन तथा नागरिक उड्डयनमन्त्री जीवनराम श्रेष्ठले फोहोरभित्रको गिरोहले नै फोहोरमैलाको व्यवस्थापन हुन नदिएको जिकिर गरेका छन् । शनिबार काठमाडौंमा आयोजित एक कार्यक्रममा उनले यस्तो बताएका हुन् ।

फोहोरमैला सामान्य कुरा भए पनि फोहोरमैलाभित्रकै गिरोहले यसलाई ठूलो विषय बनाइरहेको उनले उल्लेख गरे । उनले स्थानीय तहले अब फोहोरमैलालाई स्रोतबाट नै व्यवस्थापन गर्नेतर्फ लाग्नुपर्नेमा जोड दिए ।

मन्त्री श्रेष्ठले फोहोरमैला व्यवस्थापन गर्ने विषयमा संघीय सरकार स्थानीय सरकारलाई  सहयोग गर्न तयार रहेको बताए । उनले पर्यटन मन्त्रालयले यी समस्या समाधानका लागि मठमन्दिरहरूमा सरसफाई गर्न राष्ट्रिय अभियान सुरु गर्न लागेको जानकारी पनि दिए ।

उनले सरसफाइको योजना पूरा गर्न संघ, प्रदेश र स्थानीय सरकारका बीचमा समन्वय आवश्यक रहेको औँल्याए । ‘नाइट टुरिजम’ व्यवस्थित बनाउन पर्यटकीयस्थल, मठमन्दिर र सम्पदालाई सुन्दर, संरक्षण र सुरक्षित बनाउन आवश्यक रहेको उल्लेख गरे ।

“फोहोरमैलाको कुराहरू अहिले लामै कथा भइसकेको छ । सामान्य कुरा हो । तर, हामीले त्यसलाई अहिलेसम्म पनि समाधान गर्न सकेका छैनौँ । फोहोरमैलाभित्रको गिरोहले फोहोरमैला समाधान गर्न दिँदैन । फोहोरमैला समाधान गर्नको लागि ठूलो कुरा होइन, ठूलो कुरा बनाइएको छ त्यहाँभित्रको गिरोहले,” उनले भने, “स्थानीय तहले फोहोरमैलालाई स्रोतबाट नै व्यवस्थापन गर्नेतर्फ जानुपर्छ । हामी सबै त्यसको लागि सहयोग गर्न तयार छौँ । हामी मठमन्दिरहरूमा सरसफाइ गर्न राष्ट्रिय अभियान सुरु गर्दै छौँ । त्यहाँबाट नै चेतनाको अभियान सुरु हुनेछ । यी योजना पूरा गर्न संघ, प्रदेश र स्थानीय सरकारको बीचमा समन्वय गरेर कामहरू लैजान्छौँ । नाइट टुरिजमको कुरा गरिरहँदा, पर्यटकहरूलाई घुमाउने कुरा गर्दा त्यो किसिमको स्थानीय वातावरण तयार गर्नुपर्छ । सरसफाइ र हाम्रा सम्पदालाई सुन्दर र संरक्षित बनाउँदै सुरक्षित बनाउन आवश्यक छ ।”

उनले सिंहदरबारबाट स्थानीय र प्रदेशमा अधिकार सरिसकेको कुरा नागरिकमा बुझाउन आवश्यक रहेको बताए ।

कार्यक्रममा वागमती प्रदेशका आर्थिक मामिला तथा योजनामन्त्री शालिकराम जम्कट्टेलले प्रदेश सरकारसँग पैसा खर्च गर्न नसकेर फ्रिज भएको अवस्था रहेको भन्दै विकासका लागि बजेट माग्न आग्रह गरे । उनले आफ्नो मन्त्रालय विकासका लागि आवश्यक बजेट दिन तयार रहेको बताए ।

योजना लिएर आउने युवालाई विकासका काम गर्न पैसाको चिन्ता नगर्न उनले आग्रह गरे । उनले काठमाडौंको विकासका लागि नयाँ ढंगले बहस गर्न आवश्यक रहेको पनि बताए ।