काठमाडौं । काठमाडौंमा आइतबार (हिजो) यो वर्षकै उच्च तापक्रम मापन गरिएको छ ।

जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार आइतबार काठमाडौंको अधिकतम तापक्रम ३२.३ डिग्री सेल्सियम मापन गरिएको थियो । त्यो यो वर्षकै उच्च तापक्रम भएको महाशाखाका मौसमविद् हिरा भट्टराईले बाह्रखरीलाई जानकारी दिए ।

यो वर्षको जुलाई १२ तारिखयता काठमाडौंको अधिकतम तापक्रम ३० डिग्रीभन्दा माथि रहेको उनले बताए ।

उनका अनुसार जुलाई महिनामा काठमाडौंको अहिलेसम्मकै उच्च तापक्रम सन् १९८९ जुलाई २२ मा मापन गरिएको थियो । त्यतिखेर काठमाडौंको अधिकतम तापक्रम ३२.७ डिग्री सेल्सियस मापन गरिएको उनले जानकारी दिए ।

आज बिहान केही स्थानमा वर्षा भएको र भोलिदेखि पानी पर्ने क्रम बढेसँगै कम गर्मी महसुस हुने मौसमविद् भट्टराईको भनाइ छ । “भोलिदेखि पानी पर्ने क्रम बढ्ने देखिन्छ । त्यसपछि तापक्रम घट्ने र कम गर्मी महसुस हुन्छ,” उनले भने ।

आज बिहान पौने ६ बजेको न्यूनतम तापक्रम २२.५ डिग्री थियो । महाशाखाले बिहान न्यूनतम र बेलुका अधिकतम तापक्रम मापन गरेर सार्वजनिक गर्ने गर्छ ।