नवलपुर । चितवन राष्ट्रिय निकुञ्जअन्तर्गत नवलपरासी (बर्दघाट–सुस्तापूर्व)को अमलटारी सेक्टरबाट उद्धार गरिएको गैँडाको बच्चा (केटो)को मृत्यु भएको छ ।

करिब एक हप्ताअगाडि अमलटारीबाट उद्धार गरेर सौराहास्थित राष्ट्रिय प्रकृति संरक्षण कोष जैविक विविधता संरक्षण केन्द्रमा लगिएको केटोको निमोनियाका कारण मृत्यु भएको जनाइएको छ । कोषका भेटेरिनरी चिकित्सक डा. अमीर सडौलाका अनुसार अन्दाजी २२ दिनको भाले बच्चाको बिहीबार मृत्यु भएको हो ।

“एक हप्ताअघि हामीले उद्धार गरेर कोषमा ल्याउँदा नै उक्त केटो अस्वस्थ थियो,” उनले भने, “उद्धार गर्ने क्रममा बच्चा कामिरहेको थियो । केटोलाई निमोनिया भएको हामीले अनुमान गरेका थियौँ ।” पोस्टमार्टम रिपोर्टमा पनि निमोनियाका कारण मृत्यु भएको देखिएको चिकित्सक सडौलाले जानकारी दिए ।

बिरामी भएर हिँड्न नसकेपछि त्यो केटोलाई आमाले छोडेको हुन सक्ने कोषको अनुमान छ । “हामीले यहाँ ल्याउँदा नै ऊ कामिरहेको थियो,” उनले भने, “तर, हामीले बचाउन सक्छौँ कि भनेर सक्दो कोसिस गरिरहेका थियौँ ।”

माउसँग छुटेका गैँडाका साना बच्चा बचाउन एकदमै मुस्किल हुने गरेको कोषका प्रमुख डा. बाबुराम लामिछानेले बताए ।

अमलटारीस्थित चितवन राष्ट्रिय निकुञ्जको पश्चिम सेक्टरले एक हप्ताअघि गैँडाको बेवारिसे बच्चा जंगलबाट उद्धार गरेर कोषको जिम्मा लगाएको उनको भनाइ छ ।

असारको २२ गते गैँडाको बेवारिसे बच्चा देखेका अमलटारी सेक्टरका कर्मचारीले उसकी आमा आएर लिएर जाने आसमा दुई दिनसम्म निगरानीमा राखेका थिए । केटो छोडेर गएको माउ दुई दिनसम्म पनि नआएपछि निकुञ्जको अमलटारी सेक्टरले उद्धार गरी राष्ट्रिय प्रकृति संरक्षण कोष जैविक विविधता संरक्षण केन्द्रमा लगेर उपचार तथा रेखदेख सुरु गरिएको थयो ।

यसअघि, निकुञ्जका विभिन्न स्थानबाट उद्धार गरेर लगिएका पुष्पा र अञ्जली नामका गैँडा कोषको परिसरमा हुर्किरहेका छन् । रासस