काठमाडौं । काठमाडौंको नेपालटारस्थित डेरामा मृतावस्थामा भेटिएकी लोकदोहोरी गायिका दिलमाया सुनार प्रकरणको अनुसन्धान अन्तिम चरणमा पुगेको छ । प्रहरीले हत्या आरोपमा उनका प्रेमी सूर्य श्रेष्ठलाई पक्राउ गरेको थियो ।

यही असार ११ गते शनिबार बिहान करिब पौने ११ बजे दिलमाया कोठामै मृतावस्थामा फेलापरेकी थिइन् । उनको घाँटीमा निलडाम देखिएको थियो ।

उनको हत्या सूर्यले नै गरेको निष्कर्ष निकाल्दै प्रहरीले सरकारी वकिलमार्फत मुद्दा बुझाउने तयारी गरेको छ । प्रहरी वृत्त गोंगबुका डीएसपी गौतम मिश्रका अनुसार मंगलबारसम्म मुद्दा बुझाइनेछ ।

उनले भने, “अनुसन्धानबारे भन्न मिल्दैन । अदालतमा बुझाइसकेपछि सबै कुरा आइहाल्छ । सूर्य र दिलमाया प्रेममा थिए । यति मात्रै भनौँ ।”

गएको असार १० गते शुक्रबार राति ‘काठमाडौंमा आफूलाई बाँच्न गाह्रो भएको’ भन्दै दिलमायाको फेसबुकमा ‘सुसाइड नोट’ आशयको स्टाटस पोस्ट गरिएको थियो । शुक्रबार राति १ बजेर २० मिनेटमा उनको फेसबुकमा स्टाटस लेखिएको थियो ।

प्रहरीका अनुसार असार ११ गते बिहान ३ बजे आसपासको समयसम्म दिलमायाले प्रयोग गर्ने मोबाइल कोठामै देखिएको थियो । तर, मोबाइल अझै फेलापरेको छैन ।

मोबाइल सूर्यले नै लुकाएको वा कतै फालेको आशंका प्रहरीको छ । सूर्य विवाहित पुरुष हुन् । उनी दिलमायासँगै ‘लिभिङ टुगेदर’मा बस्दै आएका थिए । आफ्नो पारिवारिक कारणले सूर्यले दिलमायाको हत्या गरेको हुन सक्ने आशंका छ ।

घटनाको राति राति पनि सूर्य दिलमायाको कोठामै रहेको खुलेको थियो । प्रहरीले सूर्यले नै हत्या गरेको दाबी गर्दै आएको छ । प्रहरीका अनुसार उनले मोबाइलका बारेमा अनविज्ञता प्रकट गर्दै आएका छन् ।

घटनामा सूर्यको संलग्नता पुष्टि हुने आधार फेलापरेको प्रहरी दाबी छ । प्रहरीले सुरुआती समयमा दिलमायाले आत्महत्या गरेको हुन सक्ने आशंका गरेको थियो । तर, घरधनीले राति घरमा एक पुरुष आएको देखेको सूचना दिएपछि प्रहरी अनुसन्धान अगाडि बढेको थियो ।

सुरुमा सूर्यले दिलमायाको घटनाबारे अनविज्ञता प्रकट गरेता पनि उनको मोबाइलको लोकेसन र मोटरसाइकल कोठाअगाडि सीसी क्यामेरामा देखिएपछि उनले उक्त शुक्रबार राति दिलमायासँगै रहेको स्वीकार गरेका थिए । सूर्यले घटनाको राति आफूले घरेलु मदिरा र मासु खाएको बताएका थिए । दिलमायाले भने ‘स्प्राइट’ पिएको उनैले बताएका थिए ।

सूर्यले बिहान ३–४ बजेतिर आफू ब्युँझिँदा दिलमाया झुन्डिरहेको देखेपछि झुन्डिएको सल लिएर निस्किएको बयान दिएका थिए । सो सल प्रहरीले महाराजगन्जस्थित कतारको भिसा सेन्टरछेउमा रहेको नालीबाट बरामद गरेको थियो ।