काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्माले पार्टीभित्र आफूहरूको विरोध गरिएको विषयमा जवाफ दिएका छन् । कांग्रेस केन्द्रीय सदस्यहरूले थापा र शर्मा गुट भेलामा सहभागी भएको भन्दै आलोचना गरेका थिए ।

सानेपामा जारी केन्द्रीय कार्यसमितिको बैठकमा शनिबार थापाले गुट भेलामा आफूहरू पार्टी बिगार्न नगएको जिकिर गरे । पहिला–पहिला गुटको भेलामा रमाएकाहरूले अहिले विरोध गरेको उनको भनाइ थियो ।

“पहिलेदेखि जो गुटको भेलामा गएका थिए, उनीहरूले विरोध गरे । पार्टी बिगार्न गएका हैनौँ,” महामन्त्री थापाले बैठकमा भने, “मैले पुरानो फोटो हेरेँ– बूढानीलकण्ठ, चाक्सीबारी को जान्थे ? बोहराटार को जान्थे ? पहिलेदेखि सबै जाने, हामी गएकोमा किन विरोध ?”

उनले महाधिवेशन भएको ६ महिनासम्म पनि विभाग गठन नभएकोप्रति असन्तुष्टि जनाए । “अब पनि गठन भएन भने राम्रो सन्देश जाँदैन । विधान अधिवेशन चाँडै गरौँ,” उनले भने ।

शनिबारै बैठकमा अर्का महामन्त्री शर्माले आफूहरूले पार्टी हितका लागि  नै काम गरिरहेको तर्क गरे ।

“हामीले राम्रो गरिरहेका छौँ । हामीले के बेठिक गर्‍यौँ ? सभापतिलाई पार्टी विभाग बनाऔँ, भातृसंस्था बनाऔँ भन्दा के बेठिक भयो र ?,” उनले प्रश्न गर्दै भने, “पार्टी सभापतिलाई खुसी पार्ने नाममा अनावश्यक गाली र आरोप नलगाऔँ । भदौ अन्तिमसम्म नीति महाधिवेशन गर्नुपर्छ, त्यो आवश्यक छ ।”

यसअघि, बैठकमा केही सदस्यहरूले पार्टीभित्र छलफलै नगरी थापा र शर्मा निर्वाचन आयोगका पदाधिकारीसित छलफल गर्न पुगेको भन्दै असन्तुष्टि जनाएका थिए ।

शनिबारकै बैठकमा उपसभापति धनराज गुरुङले आफूहरूले सभापतिलाई कमजोर बनाउने कुनै क्रियाकलाप नगरेको बताए ।