मुम्बई । व्यवसायी तथा आईपीएलका पूर्वकमिस्नर ललित मोदीले शुक्रबार साँझ गरेको ट्विटले यतिबेला हलचल मच्चाएको छ । मोदीको उक्त ट्विटपछि बलिउड अभिनेत्री सुष्मिता सेन र व्यवसायी तथा आईपीएलका पूर्व कमिस्नर ललित मोदीको अफेयरको चर्चा–परिचर्चा चल्न थालेको छ । 

मोदीले शुक्रबार गरेको ट्विटमा उनले अभिनेत्री सुष्मितासँगको कोजी फोटोहरू सेयर गर्दै आफूहरू प्रेममा रहेको संकेत गरेका हुन् । मोदीले फोटो हाल्दै लेखेका छन्, “माल्दिभ्स, सार्दिनियामा ग्लोबल टुर गरेर भर्खरै लन्डन फर्कियौँ परिवारसँग–मेरो बेटर हाल्फ पार्टनर सुष्मिता सेन–अन्ततः नयाँ सुरुवात, नयाँ जीवन । ओभर द मुन । प्रेममा पर्नु भनेको विवाह अझै होइन । तर, त्यो पनि पक्का हुनेछ ।”

मोदीको यही ट्विटपश्चात् मिडियामा उनीहरूको प्रेमसम्बन्ध अनि चिनाजानी कहिलेदेखि थियो भन्ने समाचारहरू बाहिरिन थालेका छन् । नवभारत टाइम्सका अनुसार ललित र सुष्मिताको चिनजान आईपीएल सुरु गर्नुअघिदेखि नै भएको थियो । उनको ललितसँग मात्रै होइन मोदी र मोदीपत्नी मीनलसँग पनि नजिकको चिनजान थियो । 

ललित र सुष्मिताको प्रेमसम्बन्धको सुरुवात

ललित र सुष्मिताको चिनजान पुरानो भए पनि उनीहरूको प्रेमसम्बन्ध भने पछिल्लो ६ महिनायता मात्रै सुरु हुन थालेको बताइएको छ । 

हुन त उनीहरू सन् २०१८ मा मोदीकी पत्नी मीनल क्यान्सरका कारण निधन भएपछि केही नजिक हुन थालेका थिए । 
तर, ६ महिनाअघि लिभइन टुगेदर प्रेमी रोहमन शोलसँग ब्रेकअप भएपछि ललितसँग प्रेमसम्बन्धमा बसेको बताइएको छ ।