मुम्बई । दिवंगत अभिनेता सुशान्त सिंह राजपूतकी प्रेमिका तथा बलिउड अभिनेत्री रिया चक्रवर्ती र उनका भाइ सोविक चक्रवर्तीविरुद्ध लागुऔषध केसमा मुद्दा दर्ता भएको छ । बुधबार नारकोटिक्स कन्ट्रोल ब्युरो (एनसीबी) ले उनीहरूसहित ३३ जनालाई अभियुक्तको रूपमा मुद्दा दायर गरेको हो । उनीविरुद्ध पूर्व–प्रेमी दिवंगत अभिनेता सुशान्त सिंह राजपूतका लागि लागुऔषध किन्ने गरेको आरोपमा मुद्दा दर्ता भएको हो । 

रिया र उनका भाइविरुद्ध लागेको चार्ज सिटमा भनिएको छ, “त्यो माथिको आपराधिक षड्यन्त्र वा अन्यथा, तिमी आरोप नं. १० रिया चक्रवर्तीले सामुएल मिरांडा, शोविक चक्रवर्ती र दीपेश सावन्त र अन्यबाट थुप्रै गाँजा लिएको र प्राप्त गाँजा दिवंगत अभिनेता सुशान्त सिंह राजपूतलाई हस्तान्तरण गरेको र ती डेलिभरीका लागि सोविक र सुशान्त सिंह राजपूतलाई मार्च २०२० देखि सेप्टेम्बर २०२० सम्म भुक्तानी गरेकोले उनीहरूलाई एनडीपीएस ऐनमा उल्लेखित प्रावधानअन्तर्गत अभियोग लगाइएको छ, जसमा धारा २७ र २७ ‘ए’ अनुसार  (अवैध यातायातलाई आर्थिक सहयोग गर्ने र अपराधीहरूलाई शरण दिने) २८. (अपराध गर्ने प्रयासको लागि सजाय), २९. (आपराधिक षड्यन्त्र र मस्यौदा आरोप) अनुसार कारबाही हुनेछ,” पीटीआई रिपोर्टले खुलासा गरेको छ । 

मंगलबार एनसीबीको आरोप पत्र (चार्जसिट) माथि सुनुवाइ भएको हो । यो मुद्दामा अब २७ जुलाईमा विशेष अदालतमा सुनुवाइ हुनेछ । 

दोषी ठहरिएमा रिया कति वर्ष जेलमा बस्नुपर्ला ?

यदि, रियामाथि लागेका सबै आरोप पुष्टि भएमा उनलाई १० देखि २० वर्षसम्म जेल सजाय हुनेछ । रियाका भाइ सोविकको मुद्दामा भने १५ देखि २० वर्षसम्म जेल सजाय हुनेछ । यद्यपि, रिया र सोविक माथिल्लो अदालतमा अदालतको निर्णयविरुद्ध अपिल गर्न पाउने अधिकार छ । 

अभिनेता सुशान्त सिंह राजपूत सन् २०२० जुन १४ तारिखमा मुम्बईको बान्द्रास्थित आफ्नै अपार्टमेन्टमा मृत भेटिएका थिए । उनको मृत्युपछि प्रेमसम्बन्धमा रहेकी अभिनेत्री रियालाई लागुऔषध मुद्दामा सेप्टेम्बर ८, २०२० मा एनसीबीले पक्राउ गरेको हो । एक महिना बाइकुला जेलमा बसेर उनलाई अक्टोबरमा जमानतमा रिहा गरेको हो ।