काठमाडौं । राजदूत सलाहुद्दिन नोमान चौधरीले काठमाडौंको स्थानीय ग्यालरीमा प्रख्यात नेपाली कलाकार गोविन्दलाल सिंह डंगोलको एकल चित्रकला प्रदर्शनीको उद्घाटन गरेका छन् । उद्घाटनमा सम्बोधन गर्दै राजदूत चौधरीले नेपाल र बंगलादेशबीचको ऐतिहासिक, भाषिक, धार्मिक र सांस्कृतिक सम्बन्धमा आधारित द्विपक्षीय सम्बन्ध रहेको बताए । 

उनले बंगलादेशी कलाकारहरूसँग गहिरो सम्बन्धको लागि नेपालको कला समुदायलाई धन्यवाद दिए । जसले दुुवै देशको बीचको मित्रताको बन्धनलाई मजबुत बनाउन महत्त्वपूर्ण भूमिका निभाएको उनको भनाइ छ । यस्तै, उनले कला र संस्कृतिको भाषालाई जनतामाझ पु¥याउन यस्ता प्रदर्शनी निकै महत्त्वपूर्ण हुने बताएका छन् । 

मुम्बईको सर जेजे स्कुलबाट ललित कला अध्ययन गरेका कलाकार डंगोलले काठमाडौंको त्रिभुवन विश्वविद्यालयको ललितकला क्याम्पसमा ३७ वर्ष अध्यापन गरेको अनुभव छ ।

कलाकार डंगोलका चित्रहरूले परम्परालाई आधुनिकतासँग जोड्छन् । उनका अधिकांश कलाकृतिहरू हिन्दू धार्मिक मिथकहरू, मण्डला र प्राकृतिक अमूर्तमा सांसारिक वस्तुहरूको यथार्थवादी चित्रण छन् । प्रदर्शनी १७ जुलाई २०२२ सम्म जारी रहनेछ ।