मुम्बई । बलिउड कलाकार रणवीर कपुर र आलिया भट्टको बहुप्रतीक्षित चलचित्र ‘ब्रह्मास्त्र–पार्ट १’ को ट्रेलर सार्वजनिक गरिएको छ । उक्त ट्रेलर दुई मिनेट ५१ सेकेन्ड लामो छ ।

सार्वजनिक ट्रेलरमा भएका काल्पनिक दृश्य र जबरदस्त भीएफएक्सले हलिउड चलचित्रलाई टक्कर दिने जिकिर गरिएको छ । अभिनेता अमिताभ बच्चनको ‘भ्वाइस ओभर’बाट सुरु हुने ट्रेलरमा रणवीर र आलियाको गजबको रोमान्टिक केमेस्ट्री देख्न सकिन्छ । उनीहरू रियल जोडी पनि हुन् । अभिनेता बच्चन, अक्किनेनी नागार्जुन र मोनी रोय समेत फिचर्ड छन् ।

अयान मुखर्जीको निर्देशन रहेको यो चलचित्र आउँदो सेप्टेम्बर ९ तारिखमा रिलिज हुँदै छ । चलचित्रमा अभिनेता शाहरुख खान केमियो रोलमा देखिने चर्चा छ । यद्यपि, ट्रेलरमा शाहरुखलाई देखाइएको छैन ।

‘ब्रह्मास्त्र’ एउटा काल्पनिक चलचित्र हो, जसको निर्माण घोषणा सन् २०१४ मा नै गरिएको थियो । विभिन्न कारणले त्यसको आठ वर्षपछि पहिलो भाग रिलिजको तयारीमा छ । यो चलचित्र हिन्दीसहित तमिल, तेलुगु, मलयालम र कन्नाड भाषामा रिलिज हुने जनाइएको छ ।