बुटवल । वैदेशिक रोजगारीमा जानका लागि विनोद मुखियाले श्रम स्वीकृत लिनेदेखि अरू कामहरू गरिसकेका थिए । धनुषाको जनकपुरधाम उपमहानगरपालिका–२२ का ३९ वर्षीय मुखिया गौतमबुद्ध अन्तर्राष्ट्रिय विमानस्थलबाट विदेश जाने तयारीमा थिए ।
उक्त विमानस्थलबाट जजिरा एयरवेजले कुवेत उडान भर्ने र काठमाडौंभन्दा टिकटमा आठ हजार रुपैयाँ सस्तो पर्ने भएपछि भैरहवाबाट जाने निर्णय गरेका थिए । टिकट पहिले नै बुकिङ गरे । सोमबार (भोलि) बिहान साढे २ बजेको उडान तालिका भएकाले शुक्रबार जनकपुर बसपार्कमा पुगेर भैरहवाका लागि बसको टिकट लिए ।
शनिबार भैरहवाका लागि हिँडे उनी । जनकपुर र भैरहवाबीच करिब ३७५ किलोमिटरको दूरी छ । उनी सवार बस ३७१ किलोमिटरजति पार गरेपछि दुर्घटना पर्यो ।
रुपन्देहीको भैरहवा–परासी सडकखण्डमा पर्ने रोहिणी खोलामा बस खस्दा नौजनाको मृत्यु भयो । उनीसहित २३ यात्री घाइते भए । बसपार्क पुग्नका लागि साढे तीन किलोमिटर दूरी मात्र बाँकी रहँदा बस खस्यो । आज बिहान जनकपुरबाट भैरहवातर्फ आउँदै गरेको लु२ख ३८४१ नम्बरको बस रोहिणी पुलको रेलिङ तोड्दै खोलामा खसेको हो ।
परिवार पाल्ने जिम्मेवारी बोकेका मुखिया अहिले अस्पतालको बेडमा छन् । आँखामा टिलपिल आँसु, मुहारमा पीडा र मनमा डर उनको हाउभाउले दर्शाइरहेको थियो । गर्धनको हड्डी भाँचिएको छ । देब्रे हात र देब्रे खुट्टामा निकै ठूलो चोट लागेको छ उनलाई । अस्पतालका अनुसार उनी चलमलाउन पनि नसक्ने अवस्थामा छन् ।
भैरहवास्थित युनिभर्सल कलेज अफ मेडिकल साइन्सेजमा उनीसहित दुर्घटनाका सबै घाइतेको उपचार भइरहेको छ ।
छोरीलाई अष्ट्रेलिया पठाउने रहर...
रुपन्देहीको तिलोत्तमा नगरपालिका–८ की ३७ वर्षीया तुलसी बस्याल छोरीलाई उच्च शिक्षा अध्ययनका लागि अष्ट्रेलिया पठाउने रहरले कागजात बनाउन चार दिनअघि काठमाडौं गएकी थिइन् । सबै काम हुन समय लाग्ने भएपछि घर फर्कने तयारी गरिन् ।
बस्याल शनिबार साँझ काठमाडौंबाट घर आउँदै थिइन् । काठमाडौंबाट नारायणघाटसम्म एउटा बसमा आइन् । नारायणघाटबाट बस फेरिन् । जनकपुरदेखि बुटवल आउँदै गरेको लु२ख ३८४१ नम्बरको बसमा चढिन् ।
दुई चालक र एक सहचालक रहेको उक्त बस आइतबार बिहान सवा ४ बजेतिर रोहिणी नदीको पुलबाट खस्यो । उनको त्यहीँ मृत्यु भयो ।
शनिबार दिउँसो परिवारसँग कुरा हुँदा छोरीको अष्ट्रेलिया जाने काम पूरा भएपछि मात्र घर फर्कन परिवारले उनलाई भनेको थियो । तर, केही दिन ढिलो हुने भएपछि उनी छोरीलाई काठमाडौंमै छोडेर शनिबार साँझ नै घर आउन बस चढेकी थिइन् ।
काम सकेर फर्कंदा गयो ज्यान
प्रायःजसो आफ्नै सवारीमा यात्रा गर्ने बुटवलका युवाउद्यमी कृष्ण बस्याल लामो समयपछि सार्वजनिक सवारीमा चढे । व्यावसायिक कामको सिलसिलामा विमानमार्फत काठमाडौं गएका उनी बसबाट फर्कंदै थिए । उनी चढेको बस नारायणगढ आइपुग्दा बिग्रियो । बनाउन धेरै समय लाग्ने भयो ।
नातामा भाउजू पर्ने तिलोत्तमा–९, मणिग्रामकी तुलसी बस्याल पनि उनीसँगै भइन् । तुलसीसहित उनी जनकपुरबाट भैरहवातर्फ आउँदै गरेको बसमा चढे । सोही बस आइतबार बिहान रोहिणी पुलबाट खोलामा खस्यो । उनीसहित भाउजू पर्ने तुलसीको पनि मृत्यु भयो ।
प्रहरीका अनुसार मृतक नौमध्ये आठ पुरुष र एक महिला छन् । जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक नवरत्न पौडेलका अनुसार पश्चिम नेपाल बस व्यवसायी प्रालि मातहत रहेको उक्त बसमा चालक र सहचालकसहित ३३ जना सवार थिए ।
घाइते सबैको भैरहवास्थित युनिभर्सल कलेज अफ मेडिकल साइन्सेजमा उपचार भइरहेको छ । यसअघि भीम अस्पतालमा उपचाररत घाइतेलाई पनि अहिले मेडिकल कलेज लगेर उपचार भइरहेको प्रहरीले जनाएको छ ।
