विराटनगर । सुनसरीको धरान उपमहानगरपालिकाको प्रमुखमा स्वतन्त्र उमेदवार हर्क साम्पाङले १६,०२६ मत प्राप्त गरेका छन् । पचास हजार बढी  मत गणना गर्दा उनले गठबन्धनका उमेदवार किशोर राईभन्दा २,८४४ मतको अग्रता कायम गरेका छन् ।

गठबन्धनका राईले १३१८२ मत प्राप्त गरेका छन् ।

नेकपा (एमाले)की मञ्जु भण्डारीले १०,६२२ मत प्राप्त गरेकी छन् । 

निर्वाचन अधिकृतको कार्यालयले दिएको जानकारीअनुसार अब १० हजार बढी मत गणना हुन बाँकी छ । यसअघि विवाद भएको वडा नम्बर २० को पुनः मतगणना भएको छ । तीनवटा मतमा मतदान अधिकृतको हस्ताक्षर नभएको पाइएकाले त्यसलाई दलले पाएको मतसंख्याबाट घटाइएको छ । 

धरानमा उपप्रमुखतर्फ गठबन्धनका अइन्द्रबिक्रम बेघाले १६,०७९ मत प्राप्त गरेका छन् । एमालेका पदम इस्वोले १४४३१ मत प्राप्त गरेका छन् । धरानको परिणाम आज रातिसम्ममा आइसक्ने निर्वाचन अधिकृत कार्यालयले जनाएको छ ।