काठमाडौं । करिब एक दशक लामो समयदेखि प्रतीक्षित रहेको हलिउड सुपरहिरो चलचित्र ‘अवतार २’को ट्रेलर सार्वजनिक भएको छ । ‘अवतार : द वे अफ वाटर’ नामसहित आउन लागेको सिक्वेलको पहिलो झलक २७ अप्रिलमा सार्वजनिक गरिएको थियो ।

यतिबेला, यो सुपरहिट चलचित्रको सिक्वेल हेर्न दर्शक व्यग्र प्रतीक्षामा छन् । हालै सार्वजनिक भएको ट्रेलरमा पहिलोमा जस्तै पेन्डोरा ग्रहको सुन्दर दृश्य देख्न पाइन्छ नै । यसका साथै अति सुन्दर दृश्य र नयाँ पात्र अनि अझ धेरै उत्कृष्टरूपमा हेर्न सकिने दाबी गरेका छन् ।

“यसपटक यहाँहरूले अझै सुन्दर दृष्य देख्न सक्नुहुन्छ, किनकि, यसपटक हामीले थ्रीडीका साथै हाई डायनामिक रेन्ज, हाई फ्रेम रेट, बृहत् रिजोलुसन र भिजुअल इफेक्ट्सको प्रयोग गरेका छौँ” निर्देशक जेम्स क्यामरनले बताए । 

वास्तवमा यो चलचित्रको कथा एउटा परिवारमा केन्द्रित छ । सार्वजनिक ट्रेलरमा सुनिने एउटा सवादमा भनिएको छ, “हामी जहाँ गए पनि, यो परिवार नै हाम्रो किल्ला हो ।”

चलचित्र डिसेम्बर १६ तारिखमा १ सय ६० वटा भाषामा रिलिज हुँदैछ । नवभारत टाइम्स