वासिङटन । हालै ट्वीटर कम्पनी खरिद गरि सबैतिर चर्चामा आएका टेस्लाका एलन मस्कले आगामी दिनहरुमा ट्वीटर प्रयोग गरेवापत् अतिरिक्त शुल्क तिर्नुपर्ने नीति ल्याउने बताएका छन् ।
फेसबुकलगायत अन्य प्रतिस्पर्धीहरुबाट धेरै पछाडि रहेको ट्वीटर कम्पनीको आम्दानी बढाउन, व्यवसायिक प्रयोजनका लागि ट्वीट गर्ने अकाउन्ट र सरकारी प्रयोगकर्तालाई अतिरिक्त शुल्क तिराउने मस्कले बताएका हुन् ।
उनले थप भने, “तर ट्वीटर साधारण प्रयोगकर्ताका लागि सधैँ निःशुल्क नै रहनेछ । यसमा कुनै शंका छैन । हामीले केबल सरकारी र व्यवसायिक प्रयोगकर्ताहरुलाई मात्र पैसा तिरेर चलाउनुपर्ने बनाइदिन सक्छौँ । किनकी शुन्य आम्दानी भन्दा त थोरै आम्दानी ठीक ।”
यसअघि मस्कले ट्वीटर खरिद गर्न बैंकहरुसँग कर्जा लिँदा पनि ट्वीटबाट पैसा कमाउन मिल्ने नयाँ प्रावधान ल्याउने बताएका थिए । यति मात्र नभएर उनले ट्वीटर कम्पनीका कर्मचारीको तलब कटौति गर्ने समेत उल्लेख गरेका थिए । यसका लागि आफूले नयाँ फिचरको तयारी गरिरहेको मस्कले बताएका हुन् ।
सोमबारको मेट गाला वार्षिक समारोहमा संचारकर्मीहरुसँग बोल्दै मस्कले आफूले अमेरिकाको ठूलो हिस्सा ट्वीटरमा सहभागी भएको हेर्न चाहेको पनि बताए ।
उनले ट्वीटरमा अल्गोरिदमको श्रोत खुला राखेर प्रयोगकर्ताहरुको विश्वसनीयता बढाउने अनि नक्कली अकाउन्टहरु हटाएर प्रयोगकर्तालाई आधिकारिकता प्रदान गर्ने योजना पनि सार्वजानिक गरिसकेका छन् । रोयटर्स