‍पोखरा । सत्ता गठबन्धनका पाँच दलबीच कास्कीका पालिका बाँडफाँटबारे छलफल चलिरहँदा सोमबार कास्की कांग्रेसका सचिवद्वय भानु ढकाल र देवेन्द्र रानाभाटको हस्ताक्षरमा एक विज्ञप्ति आयो । जहाँ नेकपा (एकीकृत) समाजवादीले अस्वाभाविक दाबी गरेको भन्दै अगाडि बढ्न नसकेको र मित्रवत प्रतिष्पर्धा गरिने उल्लेख गरिएको छ ।

केन्द्रमा कांग्रेस वरिष्ठ नेता रामचन्द्र पौडेलको संयोजकत्वमा बसेको स्थानीय तह निर्वाचन तयारी, परिचालन तथा अनुगमन समितिको बैठकमा एकीकृत समाजवादीले कुनै पनि हालतमा पोखरा नछाड्ने दाबी गरिरहेको छ । पोखरा एकीकृत समाजवादीले पाउने हल्ला चल्नासाथ गत हप्ता कास्कीको टोली काठमाडौं गएर कांग्रेस पदाधिकारीलाई भेटेर कांग्रेसले प्रमुख नपाए चुनाव हारिने र त्यसको परिणाम केन्द्रले भोग्नुपर्ने चेतावनी दिएर आएको थियो ।

तर पनि, गठबन्धन बाँडफाँटको विषयमा केन्द्रित रहेर बसेको बैठकमा पेस भएको ड्राफ्टअनुसार पोखरा एकीकृत समाजवादीलाई नै दिने प्रस्ताव आएको छ । सोही प्रस्तावलाई लिएर कास्की कांग्रेस सभापति किशोरदत्त बरालले रामचन्द्र पौडेललाई फोन गरेर पुनः चुनावको परिणाम उल्टो आउने र एकीकृत समाजवादीलाई बोकेर कांग्रेसले चुनाव जिताउन नसकिने जानकारी गराए ।

आइतबार बिहान नै ११ बजेतिर कांग्रेसबाट पोखरामा मेयरका १८ जना आकांक्षीलाई कांग्रेस महानगर समितिले परिचयात्मक कार्यक्रमका लागि बोलायो । त्यो कार्यक्रम चल्दाचल्दै फेरि एकपटक पोखरा एकीकृत समाजवादीलाई दिने निर्णय भइसकेको भन्ने हल्ला फैलियो ।

त्यो अपुष्ट खबरको स्रोतका लागि नेताहरूले फोन घुमाए ।

अन्तिममा रामचन्द्र पौडेलले नै कास्की सभापति बराललाई फोन गरेर भने, “कुनै टुंगो लागेको छैन । तपाईंहरू नआत्तिनुहोस् ।”

त्यसपछि गठबन्धनको बैठकमा सहभागी हुन गएका बराल बैठक सुरु नहुँदै उनकै सचिव भानु ढकालले कास्कीमा एकीकृत समाजवादीसँगको तालमेलको सम्भावना सकिएको भन्दै सामाजिक सञ्जालमा लेखे । त्यसको केही बेरमा विज्ञप्ति नै आयो ।

विज्ञप्तिमा अस्वाभाविक दाबीका कारण एकीकृत समाजवादीसँगको तालमेल सकिएको भनिए पनि खासमा एकीकृत समाजवादीलाई पोखरा नदिनकै लागि केन्द्रलाई दबाब दिन कास्की कांग्रेसले विज्ञप्ति रणनीति प्रयोग गरेको हो ।

एकीकृत समाजवादीले कांग्रेससहित गठबन्धनको बैठकमा आफूहरूको मतलाई कम नआक्न दाबी गर्दै आएको छ । झन्डै १८ हजारको मतसंख्या विवरणसहित तयार पारेको समाजवादीको दाबी छ ।

तर, कांग्रेससहितका अन्य दलले त्यसलाई पत्याउँदैनन् ।

“हामीले उनीहरूले पेस गरेको विवरण क्रस चेक गरेका छौँ । त्यो फेक डाटा हो, उनीहरूको जनमत नघटोस् भनेर मात्रै हामीले नभनेका हौँ, बढीमा उनीहरूको मत चाहिँ पाँच हजार नै होला,” एक नेताले भने ।

केन्द्रमा पनि कांग्रेसले समाजवादीले पेस गरेको मतसंख्या झुट रहेको ब्रिफिङ गरेको छ ।

फेक मतदाता देखाएर र समाजवादीलाई टिकट दिएर कांग्रेसले चुनाव जिताउन नसक्ने हुँदा मेयरको टुंगो नलाग्दै कास्की कांग्रेसले तालमेल नगर्ने निर्णय गरेको हो ।

गठबन्धनको बैठकमा पनि कांग्रेसले अन्य दललाई 'भकारीबाट डालोमा खनाउँदा पोखिन्छ' भन्ने जवाफ दिएर पोखरामा कांग्रेसकै नेतत्वमा चुनावमा जानुपर्ने अडान लिएको छ ।

कास्की कांग्रेस सचिव भानु ढकालले अब गठबन्धनको बैठक मेयर कसले पाउने भागबण्डा सकिए पछि मात्रै बस्ने जानकारी दिए ।