विराटनगर । नेपाली कांग्रेसमा महामन्त्री विश्वप्रकाश शर्माले चुनावबाट नै समाज कस्तो बनाउने र कस्तो नेतृत्व ल्याउने भन्ने तय हुने बताएका छन् । उनले आगामी चुनावमा भाग लिन सर्वसाधारणलाई आह्वान पनि गरेका छन् ।

मोरङको बेलबारीमा आज आयोजित सभामा बोल्दै शर्माले भने, “घर घरमा गएका सबैले निर्वाचनमा भाग लिन जानुपर्छ । यो अवसरलाई राजनीतिक दलले भन्दा जनताले बढी उपयोग गर्नुपर्छ । निर्वाचनमा सहभागी हुनुपर्छ । समाज कस्तो बनाउन चाहन्छौँ भन्ने प्रश्न छ ? दल कस्तो बनाउन चाहन्छौँ भन्ने छ ? समाज बस्तो बनाउने भन्ने विषय पनि चुनावले निर्क्यौल गर्दछ त्यसैले भाग लिनुपर्दछ ।”

शर्माले शान्ति दुई प्रकृतिको हुने र एउटा घरमूलीले सबैलाई ठिक पारेर राखेको अनि अर्कोमा खुला शान्ति हुन सक्ने स्पष्ट गरे । 

अबको चुनावबाट कांग्रेस पहिलो शक्तिको रूपमा  स्थापित हुने दाबी गर्दै शर्माले कांग्रेस नेतृत्वको पंक्ति विविधतायुक्त भएको सुनाए । 

“हेर्दा अन्य दलभन्दा शेरबहादुर देउवा नै उमेरमा जेठो नेतृत्व भएकाले युवालाई काम नलाग्नु होला भन्ने लाग्ला तर महामन्त्री जस्तो प्रतिस्पर्धी पदमा युवा पुस्ताको खोज्नु पर्दा त्यहाँ देखिन्छ,” शर्माले भने,“अनुभवी नेतृत्वपङ्ति र युवा जोस दुवै कांग्रेसमा छ ।”

उनले पाकाले विश्वास गर्नुपरे पाका नेता र युवाले गर्नुपर्ने युवा नेतृत्व कांग्रेसमा रहेको बताए । उनले भने, “समाज किन बद्लिएन ? अर्थतन्त्र किन कमजोर भएको छ ? बजारमा किन महँगी बढेको छ ? जनताका छोराछोरी किन विदेशिनु परेको छ ? किन यो देशका युवामा नविन आशा भर्न सकिएको छैन ? यस्ता प्रश्नको उत्तर खोज्नुपर्छ ।”