किभ । युक्रेनका राष्ट्रपति भोलोदोमिर जेलेन्स्कीले आफ्नो सरकार रुससँगको शान्ति सम्झौताका लागि तटस्थ नीति अबलम्वन गर्नेबारे छलफल गर्न तयार रहेको बताएका छन् । 

रुसी स्वतन्त्र पत्रकारहरूलाई अन्तर्वार्ता दिनेक्रममा उनले यस्तो कुनै सम्झौताका लागि युक्रेनमा जनमत संग्रह गर्नुपर्ने स्थिति आउनसक्ने पनि बताएका छन् । उनले यसअघि पनि यस्तै प्रतिक्रियाहरू दिइसकेका छन् । तर, यसपालि उनले अलि सशक्त ढंगले अभिव्यक्ति दिएका छन् । 

यसै साता टर्कीमा रुस र युक्रेनबीच फेरि वार्ता हुँदै छ । भिडियो कन्फरेन्समार्फत दिइएको नब्बे मिनेट लामो अन्तर्वार्तामा जेलेन्स्कीले भनेका छन्, “सुरुक्षाको ग्यारेन्टी र तटस्थता, हाम्रो मुलकको गैरआणविक स्थितिका लागि हामी यो कुरा स्वीकार गर्न तयार छौँ । यो सबैभन्दा महत्वपूर्ण विन्दु हो "

तटस्थको अर्थ कुनै पनि मुलुक सैन्य रूपमा कुनै अन्य समूहमा समाहित नहुनु हो ।

यसैगरी जेलेन्स्कीले कुनै पनि सम्भावित सम्झौताका लागि रुसी राष्ट्रपति भ्लादिमिर पुटिनसँग साक्षात्कार वार्ता र युक्रेनमाथि कुनै पनि आक्रमण नहुने प्रभावकारी सुरक्षा ग्यारेन्टीको आवश्यकता हुने बताएका छन् ।

अन्तर्वार्ताभरि नै रुसी भाषा बोलेका उनले रुसी आक्रमणका कारण युक्रेनका रुसी भाषी सहरहरू ध्वस्त भइरहेको पनि औँल्याएका छन् । अन्त्यमा उनले युक्रेनले यथासम्व चाँडो 'शान्ति' चाहेको बताएका छन् । 

लामो समयदेखि पुटिनले युक्रेनको तटस्थता र यसले नेटोको सैनिक गठबन्धनमा प्रवेश नगर्ने ग्यारेन्टीको माग गर्दै आएका छन् ।

बीबीसीबाट ।