जनकपुरधाम । स्थानीय तह निर्वाचनको मिति नजिकिँदो छ । आउँदो वैशाख ३० गते हुने निर्वाचनका लागि दलहरूले प्रचारप्रसार थालिसकेका छन् । दलहरूले उमेदवार छनोटबारे पनि छलफल गरिरहेका छन् । टिकट पाउन आकांक्षीहरूको दौडधुप जारी छ ।

मधेस प्रदेशको राजधानी जनकपुरधाम उपमहानगरपालिकाको प्रमुखका लागि एक दर्जनभन्दा बढी आकांक्षीले आन्तरिक तयारी गरिरहेका छन् । आकांक्षीहरूको तयारीसँगै चुनावी आकलन पनि सुरु भएको छ ।

एक्लै मेयर/उपमेयरसहित १२ वडाध्यक्ष जितेको तत्कालीन राष्ट्रिय जनता पार्टी (राजपा) विलीन भइसकेको छ । तत्कालीन संघीय समाजवादी फोरम र राजपाबीच एकता भई जनता समाजवादी पार्टी (जसपा) बनेको थियो ।

स्थानीय निर्वाचनको डेढ वर्षपछि भएको एकता जनप्रतिनिधिको कार्यकाल नसकिँदै विभाजन भइसकेको छ । पूर्वराजपाका नेताहरू जसपाबाट अलग्गिएर महन्थ ठाकुरको नेतृत्वमा लोकतान्त्रिक समाजवादी पार्टी (लोसपा) गठन गरी चुनावी प्रतिस्पर्धामा छन् ।

ठाकुरकै नेतृत्वको तत्कालीन राजपाबाट नगरप्रमुखमा निर्वाचित लालकिशोर साह अहिले जसपामा छन् । ०७४ को निर्वाचनमा उनी निकटतम प्रतिद्वन्द्वी नेपाली कांग्रेसका मनोज साहभन्दा दोब्बर बढी मतले विजय भएका थिए । साह नहुँदा लोसपालाई असर गर्ने नेताहरूको विश्लेषण छ । यद्यपि, उपप्रमुख रीता झासहित १२ निर्वाचित वडाध्यक्षहरू लोसपामै छन् । तर पनि लोसपा कमजोर रहेको विश्लेषण गरिन्छ ।

जनकपुरका केही परिचित अनुहारहरू लोसपाबाट पनि अलग्गिएर करिब एक महिनाअगाडि अर्को पार्टी गठन गरिसकेका छन् । पूर्वराष्ट्रियसभा सदस्य वृषेशचन्द्र लाल र संविधानसभा सदस्य डा. विजय सिंह लोसपा परित्याग गरी तराई मधेस लोकतान्त्रिक पार्टीमा प्रवेश गरेका हुन् ।

यो अवस्थामा लोसपा निकै कमजोर रहेको धेरैको बुझाइ छ । लोसपाबाट यसपालि चार आकांक्षीले टिकटका लागि ‘लबिङ’ गरिरहेका छन् । उपप्रमुख झा नगरप्रमुख साहको नेतृत्वमा काम गर्न नसकेको भन्दै अब मेयर बनेर जनतालाई दिएको वाचा पूरा गर्ने बताउँछिन् ।

“महिला इमानदार हुन्छन् । अवसर दिनोस् काम गरेर देखाउँछु,” उनले भनिन् ।

जनकपुरधाम–७ का वडाध्यक्ष जानकीराम साहले पनि मेयरकै लागि तयारी गरिरहेका छन् । उनले यसपालि मेयरमा टिकट नपाए ‘बागी’ हुने सम्भावना छ । लोसपाका नगर अध्यक्ष मनोज चौधरी पनि मेयरकै लागि लागिपरेका छन् । प्रदेशसभा सदस्य परमेश्वर साह पनि मेयरका आकांक्षी हुन् ।

कांग्रेसमा तीन
जनकपुरधाम उपमहानगरको मेयरका लागि नेपाली कांग्रेसबाट तीनजनाले उमेदवार बन्ने इच्छा देखाएका छन् । यसअघिका प्रत्यासी मनोज साह अहिले पार्टीको नगर सभापति छन् । उनले आफ्नो दाबी कायमै राखेका छन् ।

कांग्रेसका नगर उपसभापति राकेशविक्रम साहले पनि परिवर्तनका लागि युवाले अवसर पाउनुपर्ने भन्दै आफूलाई प्रस्तुत गरिरहेका छन् । “जनकपुरमा फ्रेस युवा अनुहारले मात्रै परिवर्तन ल्याउन सक्छ,” उनले भने ।

राकेश ०७४ को निर्वाचनमा तत्कालीन डा. बाबुराम भट्टराई नेतृत्वको नयाँ शक्ति पार्टीनिकट थिए । त्यति बेला स्वतन्त्रबाट मेयरमा उठेर सम्मानजनक मत ल्याएकाले आफूले कांग्रेसबाट टिकट पाउनुपर्ने उनको भनाइ छ ।

पूर्वमेयर बजरंगप्रसाद साह पनि कांग्रेसबाटै मेयरका आकांक्षी हुन् । उनले टिकट नपाए दल त्याग गर्न सक्ने चर्चा छ ।

जसपामा को ?
जसपाबाट मेयरका आकांक्षीमध्ये वर्तमान नगरप्रमुख लालकिशोर साह नै बलियो दाबेदार देखिएका छन् । पुनः मेयरमै उठ्ने सर्तमा उनी जसपा प्रवेश गरेको बुझिएको छ ।

जनकपुरधामको मेयरका लागि जसपाका नगर अध्यक्ष विष्णुदेव साहले पनि आफ्नो दाबी प्रस्तुत गरिरहेका छन् । यद्यपि, पार्टीको निर्णयानुसार अघि बढ्ने उनको भनाइ छ ।

“म विगतमा पनि मेयर पदको उमेदवार थिएँ । त्यसकारण जसपाबाट मेरो नाम पहिलो नम्बरमा छ,” उनी भन्छन्, “तर, पार्टीले जसलाई टिकट दिन्छ स्वीकार गर्छु ।”

जसपाबाटै बजरंग यादव पनि मेयरको आकांक्षी छन् ।

एमालेबाट दुई आकांक्षी
नेकपा (एमाले)बाट मेयरका लागि शिवशंकर साह र अशोक चौधरी आकांक्षी देखिएका छन् । ०७४ मा एमाले तेस्रो स्थानमा थियो । यद्यपि, मत संख्या निकै कम थियो ।

नेकपा (माओवादी केन्द्र), नेकपा (एकीकृत समाजवादी) र जनमत पार्टीबाट हालसम्म कोही पनि आकांक्षी खुलेका छैनन् । यी दल अर्को दलका उमेदवारलाई समर्थन गर्ने मनिस्थितिमा छन् ।