काठमाडौं । गायक प्रकाश सपूतले आफ्ना नयाँ गीत ‘पिर’को भिडियोको विवादित दृश्य हटाएका छन् । तत्कालीन माओवादी जनयुद्धका महिला लडाकु हाल यौन पेशा गर्न बाध्य भएको दृश्य भिडियोबाट हटाइएको छ । 

माओवादीका केही नेता, कार्यकर्ता तथा संगठनहरूले आलोचना गरेपछि उनले भिडियोबाट उक्त दृश्य हटाएका हुन् । यद्यपि, उनले आफूलाई कसैको दबाब वा धम्की आएका कारण भने नहटाएको स्पष्ट पारेका छन् । नियोजित रूपमा माओवादी आन्दोलनलाई बदनाम गर्न खोजिएको भन्ने बुझिने र त्यसले उठाएको अन्य यथार्थ विषयहरु विषयान्तर भैरहने जस्तो देखिएकाले उक्त दृश्य हटाउनु परेको उनले स्पष्ट पारेका छन् । 

सम्बन्धित पक्षको आत्मसम्मानमा ठेस पुगेको र उक्त दृश्यका कारण गीत र भिडियोका अन्य पक्ष छायामा पर्ने अवस्था आएका कारण विवादित दृश्य हटाइएको प्रकाशले सामाजिक सञ्जालमार्फत स्पष्ट पारेका छन् । सम्पादित भिडियो पुनः अपलोड गरिएको छ । 

“पिरले सफलता मात्रै होइन धेरै कुरा सिकाएको र सचेत गराएको छ । तथ्यपरक सिर्जना गर्दा त्यसलाई नेपाली दर्शक स्रोता, सम्बन्धित कथा पात्रले चित्रण गर्ने समूह÷समुदाय र समग्र समाजको कस्तो दृष्टिकोण रहन्छ भन्ने कुराको हेक्का राख्नु पर्ने चेत गराएको छ,” उनले भनेका छन्, “सिर्जना गर्दा  अझै धेरै अध्ययन गर्न प्रेरित गरेको छ । यद्यपि, सर्जकले आफ्नो सिर्जनात्मक दायरा खुम्च्याउने की सिर्जनाप्रति दर्शकले आफ्नो दृष्कोण फराकिलो बनाउने ? यो  बहस हुन जरुरी छ ।”

सात दिनसम्म युट्युबको ट्रेन्डिङ एकमा रहेको गीतको भिडियो एक सातामा एक करोडभन्दा धेरै पटक हेरिसकिएको छ ।