काठमाडौं । गोल्छा ग्रुपले थापाथली क्याम्पसका विद्यार्थीहरूलाई विद्युतीय गाडी बनाउन आर्थिक सहयोग गरेको छ । यो गाडीले सन् २०२० को अक्टोबरमा अन्तर्राष्ट्रिय प्रतियोगिता शेल ईको म्याराथनमा भाग लिएको थियो ।

विद्यार्थीहरूले आवश्यक सीपानुसार टोली निर्माण गर्ने, प्रायोजकहरू खोज्ने, कार्यस्थललाई अन्तिम रूप दिनेजस्ता प्रारम्भिक गतिविधिहरूबाट काम सुरु गरेको थियो । २०२२ फेब्रुअरीसम्म टोलीले सवारीसाधनको डिजाइन र डेभलपमेन्ट सफलतापूर्वक सम्पन्न गरेको छ ।

विभिन्न टेस्ट राइडहरूपछि विद्युतीय गाडी ‘मैचा’ अहिले पूर्ण रूपमा प्रतिस्पर्धा गर्न तयार भएको छ । सबै नियमहरू पलना गर्दै उपलब्ध निर्देशन र स्पेसिफिकेसनहरूअनुसार गाडी बनाइएको जनाइएको छ ।

‘मैचा’को ब्याट्रीले एक किलोवाट चार्जबाट १५० किलोमिटर सम्मको रेन्ज दिने जनाएको छ । मैचाको निर्माणकर्ता टिम सिरेटोले नेपालमा विद्युतीय सवारीमा विभिन्न अनुसन्धान र कार्यहरू सञ्चालन गरेर दिगो भविष्यमा योगदान पुर्‍याउने लक्ष्य राखेको छ । उनीहरू शेल ईको म्याराथनमा प्रतिस्पर्धा गर्ने नेपालको पहिलो (विद्युतीय सवारी) टोली हो ।