काठमाडौं । सत्तारूढ दल नेपाली कांग्रेसका महामन्त्री गगन थापाले सत्ता गठबन्धनको भविष्य समाप्त भएको संकेत गरेका छन् । 

बिहीबार संसद भवनबाट बाहिरिने क्रममा सञ्चारकर्मीहरूलाई प्रतिक्रिया दिँदै उनले गठबन्धनबाट पार नलाग्ने निस्कर्ष निक्लिएको बताए । उनले एमसीसीबारे गठबन्धनका दलहरूबाट देशलाई ध्रुवीकरण गराइएको बताए । एमसीसीबाहेक अन्य विषयमा गठबन्धन एक ठाउँमा उभिनसक्ने अवस्था नआउने उनको भनाइ छ ।

थापाले गठबन्धन संकटमा परेसँगै प्रतिपक्ष दल एमालेसँगको सहकार्यमा संसद् अघि बढाउने बताए । यसका लागि कांग्रेसले संसद् खुलाउन पहल गरिरहेको छ । उसले एमालेले राखेको मागहरूको विषयमा कांग्रेसले एमालेसँग संवाद अघि बढाउने भएको छ । 

“यो विषयबाहेक बाँकी रहेको अन्य विषयमा एक ठाउँमा उभिन्छौँ भन्ने अवस्था रहँदैन,” उनले भने “यो गठबन्धन अघि जाने विषयमा समस्या आयो । सदनको अवरोध खोल्ने कुरामा छलफल गरेर अघि बढौँ भन्ने सहमति भयो।”