काठमाडौं । बलात्कार मुद्दामा नेकपा (एमाले)का नेता तथा मुगुका सांसद मोहन बानियाँविरुद्ध गएको बुधबार जिल्ला अदालत बाँकेले पक्राउ पुर्जी जारी गरेको छ । योसँगै प्रहरीले उनको खोजी कार्य सुरु गरेको बाँकेका प्रहरी प्रवक्ता डीएसपी मधुसुदन न्यौपानेले जानकारी दिए ।

आफूविरुद्ध उजुरी पर्नुअघि उनी आफू निर्दोष रहेको दाबी गर्थे । तर, पछि पीडित महिलाले प्रहरीमा उजुरी दिएपछि उनी सम्पर्कविहीन छन् ।

पीडित महिला हाल जुम्लामा छिन् । उनले आफूले दिएको २५ लाख रूपैयाँ फिर्ता लिन भेट्ने क्रममा जबरजस्ती गरेको दाबी गरेकी छन् । सांसद बानियाँले आफूले जबरजस्ती गरेको कुरा बाहिर ल्याए मार्नेसम्मको धम्की दिएको उनको भनाइ छ ।

संयुक्त रूपमा व्यवसाय गर्नका लागि आफूले सांसद बानियाँलाई पैसा दिएको ती महिलाले बताएकी छन् । बानियाँले आफूलाई २५ लाखको चेक दिए पनि सो चेक नसाटिएको उनको भनाइ छ ।

त्यसपछि आफूले बानियाँलाई सम्पर्क गरेर पैसा दिन आग्रह गरेकी थिइन् । पैसा नदिएमा मुद्दा हाल्नेसम्मको चेतावनी दिएपछि बानियाँबाट पाँच लाख पाएको उनले बताइन् ।

उनकाअनुसार सांसद बानियाँले बाँकी २० लाख रूपैयाँ चेक साँटेर नेपालगञ्जमा दिने भनेका थिए । त्यसपछि उनी पैसा लिन नेपालगञ्ज पुगेकी थिइन् ।

‘‘२० लाख दिने भनेपछि म अप्सरा होटल पुगेँ । बेलुका नै लेनदेनको कारबोबार गरौँ भन्दा भोलि बिहान गरौँला भन्नुभयो । एक घन्टा डिस्कस भयो । हामी त्यहीँ बस्यौँ,” पीडित महिलाले भनिन्, “साँझ हामीबीच झगडा पनि भयो । सायद हामीबीच भएको झगडा छेउछाउका मानिसले थाहा पाए होलान् ।”

भोलिपल्ट बिहान पैसाको कारोबार गर्न भन्दै आफूले ढोका खोल्न लगाएपछि बानियाँले आफूमाथि जबरजस्ती गरेको उनको दाबी छ ।

‘‘पैसाको कारोबार गर्ने भन्दै बिहान ढोका खोल्न लागाएँ । मैले पैसाको कारोबार गरौँ भन्दा सँगै जिउने, सँगै मर्ने भन्दै सांसद बानियाँले जबरजस्ती गर्न थाल्नुभयो,” पीडित महिलाले भनिन् ।

पैसा माग्न आफूले पटक–पटक फोन गर्दा बानियाँले फोन काट्ने तथा नउठाउने गरेको उनको भनाइ छ ।  

“सांसदजस्तो मान्छेले पैसा दिइहाल्नुहुन्छ भनेर केही भनिन,” उनले भनिन्, “लामो समय झुलाएपछि सामाजिक सञ्जाल फेसबुकमा स्टाटस लेखेँ । मुद्दा हाल्छु भनेपछि उनी सम्पर्कमा आएका थिए ।”

जबरजस्तीकरणीपछि आफूले यी सबै कुरा बाहिर निकाल्छु भन्दा बानियाँले 'तपाईंको र मेरो पैसा एउटै हो' भनी यस्ता कुरा बाहिर ननिकाल्नु, बरु जे गर्नुपर्छ गरौँला भनी आफूलाई आश्वासन मात्र दिएको उनले बताइन् ।

तर, घटना बाहिर ल्याएर छाड्ने भनेपछि बानियाँका कार्यकताले आफूलाई धम्काउनेदेखि ज्यान मार्नेसम्मको धम्की दिएको पीडित महिलाको भनाइ छ । 

‘‘घटनापछि प्रहरीलाई खबर गर्न अप्ठेरो लागेको थियो । नेपालगञ्ज एयरपोर्ट जाँदा गाउँको एकजना भाइ भेटेँ । तिनै भाइलाई सबै कुरा बताएँ,” उनले भनिन्, “त्यसपछि हामी उनलाई कारबाही गर्ने निर्णयमा पुग्यौँ । तर, पटक–पटक फोन गर्दा उठाएनन् । र, म्यासेज पनि फर्काएनन् ।”

त्यसपछि बानियाँको छोरालाई फोन गर्दा नउठेपछि आफूले सोही बेलुका ४ बजे मैले प्रहरीलाई खबर गरेको उनले बताइन् । 

“त्यसपछि भोलिपट्ट जिल्ला प्रहरी कार्यालय बाँकेमा बोलाइयो । म त्यहाँ गएँ । मुद्दा दायर हुन दुई/तीन दिन लाग्यो । सोही समयमा बानियाँका ज्वाइँ आएर भोलि १० बजे पैसा दिने बताए,” ती महिलाले भनिन्, “‘ममाथि यत्रो बज्रापात भयो, अस्मिता लुटियो । घरमा के भन्लान्, माइतीले के भन्लान् भनी जवाफ फर्काएँ । अन्तिममा सहनै नसकेपछि मुद्दा दर्ता गराएँ,”उनले भनिन् ।

मोहन बानियाँ र महिलाबीच आरोपप्रत्यारोप 
केही दिनअघि मोहन बानियाँले आफूलाई फसाउन खोजेको भन्दै सामाजिक सञ्जाल फेसबुकमार्फत् आपत्ति जनाएका थिए ।

‘‘महिलासँग यस्तो बाउन्स चेकको कुरा चलेकाबेलामा यस्ता कथित काम हुन सक्छ कि सक्दैन । त्यो जोकोहीले पनि अनुमान लगाउनसक्ने कुरा हो,” उनले सामाजिक सञ्जालमा लेखेका छन्, “आवश्यक पर्दा हामीसँग धेरै प्रमाण सुरक्षित छन् । बेइज्जतीको ढोका नखोलौँ भनेर चुप बसेको हुँ । यो त धोका र बेइमानीको परकाष्टा हो ।”

त्यसैगरी, सामाजिक सञ्जालमार्फत नै पीडित महिलाले सांसद बानियाँले पैसा दिनुको साटो उल्टै चेक खोसेर लिएको र जघन्य अपराधमा पारेको बताएकी छन् ।

उनले आफ्नो ज्यान जोखिममा परेको बताउँदै यदि आफ्नो मृत्य भएमा  मोहन बानियाँका कारणले हुने बताएकी छन् । “यसको जवाफदेही मोहन बानियाँ हुनुपर्छ,” उनले सामाजिक सञ्जालमा लेखेकी छन् ।