जनकपुरधाम । जयनगर–कुर्था रेलमार्गमा ‘ड्रायरन’का लागि आजदेखि रेल सञ्चालन गरिएको छ । नेपाल ल्याइएको १७ महिनापछि यात्रुबिना रेल गुडाउन थालिएको हो ।

भारतबाट ८४ करोड रुपैयाँमा खरिद गरी ०७७ असोज २ गते रेल नेपाल ल्याइएको थियो । नियमित रेल सञ्चालनमा अवरोध नहोस् भन्ने उद्देश्यले उद्घाटनअगावै ड्रायरन गर्न लागिएको नेपाल रेलवे कम्पनीका महाप्रबन्धक निरञ्जनले झाले जानकारी दिए ।

उनका अनुसार दैनिक दिनमा एकपटक रेल जयनगरबाट–कुर्थासम्म चलाइनेछ । रेल कुर्थाबाट फर्किएर धनुषाको जनकनन्दनी गाउँपालिकाको इनरुवामा पार्किङ गरी राखिनेछ ।

एसी र जनरल गरी १३ सय यात्रु बोक्न सक्ने रेलको क्षमता छ । आजदेखि सुरु भएको ड्रायरनमा यात्रुलाई सेवा दिइएको छैन । रेलमा सुरक्षाकर्मी, जनप्रतिनिधि, रेलवेका कर्मचारी र सञ्चारकर्मी सवार थिए ।

रेल सञ्चालनमा आउने आमसर्वसाधारणमा सन्देश दिन, रेलवे लिकमा लगाइएको हाट बजार खाली गराउन र दैनिक लागत पत्ता लगाउन रेल सञ्चालन गरिएको साइट इन्जिनियर विनोद ओझाले जानकारी दिए ।

६० नेपाली र १४ भारतीय कर्मचारी काममा खटिएका छन् । १२ भारतीय कर्मचारी उद्घाटनपछि आउने बताइएको छ ।

थप तस्बिर हेर्नोस्–