काठमाडौं । राष्ट्रनिर्माता पृथ्वीनारायण शाहको सम्मानमा नेपाली सेनाले राष्ट्रिय कविता प्रतियोगिता–२०७८ आयोजना गर्ने भएको छ ।

३००औँ पृथ्वी जयन्ती तथा राष्ट्रिय एकता दिवसको अवसर पारेर सेनाले गैरसैनिक व्यक्तिहरूलाई समेत समावेश गरी कविता प्रतियोगिता आयोजना गर्न लागेको सेनाको जनसम्पर्क तथा सूचना निर्देशनालयले जनाएको छ ।

प्रतियोगितामा सहभागी हुन चाहने व्यक्तिले यही पुस १७ गतेसम्म सेनाको इमेल ठेगाना kabita@nepalarmy.mil.np मा आफ्नो कविता पठाउन सक्नेछन् । सेनाको आधिकारिक वेबसाइट www.nepalarmy.mil.np मा गई प्रतियोगितासम्बन्धी थप जानकारी प्राप्त गर्न सकिनेछ ।

प्रतियोगितामा उत्कृष्ट १० जनालाई जनही २० हजार तथा थप छनोट भएका २० जनालाई जनही पाँच हजार रुपैयाँ नगद र प्रमाणपत्र प्रदान गरिने जंगी अड्डाले जनाएको छ ।