विराटनगर । विराटनगर स्थित आरोहण गुरुकुलले चर्चित कवि तीर्थ श्रेष्ठको एकल कविता वाचन कार्यक्रम आयोजना गर्यो । 

‘काव्यारोहण’अन्तर्गत आरोहण कविता यात्राको छैटौं शृंखलामा, बितेको साढे चार दशकभन्दा बढीदेखि साहित्य लेखनमा सक्रिय श्रेष्ठले आफ्ना दुई दर्जन कविता वाचन गरे । 

गुरुकुलको नाट्यघरमा आयोजित कार्यक्रममा कवि श्रेष्ठले ‘प्रेमको पुस्तक’, ‘बाघ’, ‘फोटोमा’, ‘बोन्साई’, ‘म मुक्तिनाथ’, ‘धर्मग्रन्थ’, ‘मलाई इलाम हुन मन लाग्यो’, ‘लाहुरेको चिठ्ठी’, ‘आमा’, ‘ओ काठमाडौं,’ ‘सर्प र राजधानी’, ‘तान्सेन’, ‘पागलहरू छन् चुपचाप’, ‘चराहरू’, ‘वृद्धाश्रमबाट आमाको चिठ्ठी’, ‘असमर्थ राजधानीसँग’, ‘लयमा’ लगायतका कविताहरू सुनाए ।

कवि श्रेष्ठले आफ्ना कवितामार्फत् माओवादी सशस्त्र द्वन्द्वका क्रममा मारिएका शिक्षक मुक्तिनाथ अधिकारीदेखि आफूलाई छाडेर जाने प्रेमिकासम्मलाई सम्झन भ्याए । आफूले वाचन गर्ने कविताको पृष्ठभूमि र रचनागर्भ पनि सुनाउँदै सारा दर्शकको ध्यान आफूतिर तानेका थिए । 

पोखरामा जन्मिएका श्रेष्ठका ‘जिन्दगीको गुरुक्षेत्रबाट,’ ‘पाइलाका नीवहरूले’ र ‘धर्सैधर्साको चक्रव्यूह’, ‘महाभारतका गीतहरू’, ‘जिन्दगीको गोधूलीमा’, ‘मेरै हिमालजस्तो’लगायतका कृतिहरू प्रकाशित छन् । 

राष्ट्रिय प्रतिभा पुरस्कार, मोती युवा वर्ष पुरस्कार, शिरोमणि पुुस्कार, वासुशशी स्मृति पुरस्कारलगायत दुई दर्जनभन्दा बढी विभिन्न पुरस्कार र सम्मानबाट विभूषित श्रेष्ठले पटक–पटक आफ्नो विगतलाई स्मरण गरे । दर्शकबाट पटक–पटक ‘वान्समोर’ भनेपछि उनले ‘हिउँमा लेखिएका नामहरू’ वाचन गरे ।

२०७६ मंसिर ७ गतेदेखि सुरु भएको काव्यारोहण शृंखलामा यसअघि बैरागी काइँला, तुलसी दिवस, बम देवान, मोमिला र मनप्रसाद सुब्बाले कविता वाचन गरिसकेका छन् । कोभिडका कारण पाँचौं शृंखलापछि काव्यारोहणलाई निरन्तरता दिन नसकिएको कार्यक्रम संयोजक रमेशचन्द्र अधिकारीले बताए । 

सशुल्क आयोजना हुने कार्यक्रममा पूर्वका मोरङसहित, धनकुटा, सुनसरी, झापा, इलामलगायतबाट कवि साहित्यकारहरू सहभागी हुने गरेका छन् । कोरोना कहर घट्दै गए अन्य शृंखलालाई निरन्तरता दिँदै जाने कार्यक्रम संयोजक धीरज राईले बताए । 

कविता वाचनपछि कवि श्रेष्ठलाई आरोहणकातर्फबाट अध्यक्ष भैरव क्षेत्रीले दोसल्ला ओढाएर सम्मान गरेका थिए ।