काठमाडौं । यातायात व्यवस्था विभागलाई स्मार्ट लाइसेन्स लिने सेवाग्राहीहरूको चाप थेग्न मुस्किल परेको छ ।

विभागका अनुसार नवीकरण गर्ने चालक, स्मार्ट लाइसेन्स नपाएका चालक गरी करिब १० लाख सेवाग्राहीले तत्काल स्मार्ट लाइसेन्स लिन खोजिरहेका छन् । यसबाहेक ६ लाख आवेदकहरूको हाल परीक्षा भइरहेको छ ।

६ लाखमध्ये साढे तीन लाख आवेदक ट्रायल परीक्षा पास गरी लाइसेन्सको पर्खाइमा छन् । बाँकी तीन लाख आवेदकको परीक्षा भइरहेको छ । यस्तै, नयाँ १० लाखजनाले लाइसेन्सका लागि आवेदन दिएका छन् ।

विभागका महानिर्देशक नमराज घिमिरे अत्यावश्यक काम गर्ने चालकहरूलाई हाल स्मार्ट लाइसेन्स वितरण गरिरहेको बताउँछन् । ‘‘स्मार्ट लाइसेन्स वितरण रोकिएको होइन । अत्यावश्यक पर्ने चालकलाई वितरण गरिरहेकै छौँ । अन्य सेवाग्राहीहरूलाई प्राथमिकताका आधारमा आउँदो आइतबार–सोमबारदेखि वितरण गर्ने तयारी गरेका छौँ,” उनले भने ।

महानिर्देशक घिमिरेका अनुसार दैनिक १० हजारथान स्मार्ट लाइसेन्स छाप्ने तयारी भइरहेको छ । ‘‘१४ लाख स्मार्टकार्ड प्राप्त गरेका छौँ । स्मार्टकार्ड डेलिभरी भइसकेको छ । स्मार्टकार्डको क्वालिटी टेस्टको लागि स्याम्पल कार्डहरू बाहिर पठाएका छौँ । स्याम्पल कार्ड सम्बन्धित ल्याबमा पुगिसकेको छ । अब करिब एक सातामा स्याम्पल कार्ड टेस्टको रिजल्ट आउँछ । रिपोर्ट आइसकेपछि सम्भवतः आउँदो आइतबार–सोमबारतिर वितरण थाल्छौँ,” उनले भने ।

स्मार्ट लाइसेन्स छाप्ने मेसिन (मासप्रिन्ट) एउटा छ । मेसिनलाई बिहान ७ देखि राति ११ बजेसम्म चलाउँदा दैनिक १० हजार स्मार्ट लाइसेन्स छाप्न सकिने विभागले जनाएको छ ।

दैनिक कार्ड प्रिन्ट गरेर सम्बन्धित यातायात कार्यालयहरूमा पुर्‍याइने विभागले जनाएको छ । सम्बन्धित यातायात कार्यालयहरूबाट सेवाग्राहीले स्मार्ट लाइसेन्स पाउनेछन् ।

विभागले खरिद गरेका स्मार्टकार्ड यही मंसिर ८ गते नेपाल आइपुगेको थियो ।

विभागले लाइसेन्स नवीकरण गरेको १० दिनमै स्मार्ट लाइसेन्स उपलब्ध गराउने जनाएको छ ।

ड्राइभिङ पेसामा आबद्ध रहेर देश–विदेशमा रोजगारी गर्ने सवारी चालकलाई प्राथमिकतामा राखेर स्मार्ट लाइसेन्स उपलब्ध गराउने विभागको तयारी छ ।

त्यस्तै, यातायात कार्यालयहरूले दिएको रसिदको आधारमा सवारी चलाइरहेका पुराना सेवाग्राहीलाई प्राथमिकतामा राखिनेछ । यसबाहेक हाल ट्रायल पास गरेका सेवाग्राहीलाई एक वर्षका लागि परीक्षणकालीन लाइसेन्स दिइने विभागले जनाएको छ ।

विभागका महानिर्देशक घिमिरे भन्छन्, ‘‘सबैलाई १४ लाख स्मार्ट कार्डले पुग्दैन । पुराना आवेदकलाई वितरण गर्छौँ । तत्काललाई ट्रायल पास गरेका सेवाग्राहीलाई परीक्षणकालीन लाइसेन्स वितरण गरिनेछ । यसबाहेक अन्य विकल्पका रूपमा नयाँ टेन्डर आह्वान गर्ने योजना छ । कोरोना महामारीका कारण पहिले खरिद गरिएका स्मार्टकार्ड समयावधिभन्दा निकै ढिलो आइपुग्यो । पुनः आह्वान गर्दा यस्तो समस्या नआउने गरी आह्वान गर्छौँ ।”

विभागले लाइसेन्सको पर्खाइमा रहेका सेवाग्राहीको चाप कम गर्न अरू विकल्प पनि खोजिरहेको जनाएको छ । परीक्षणकालीन लाइसेन्स वितरण थालिसकेकाले स्वदेशभित्रका नयाँ सवारी चालकहरूलाई पहिलाको जस्तो सास्ती नहुने महानिर्देशक घिमिरेको भनाइ छ ।