काठमाडौं । ढल्केबर सबस्टेसनमा आगलागी भएपछि नेपाल विद्युत् प्राधिकरणले छानबिन थालेको छ । सबस्टेसनको अध्ययन, निरीक्षण तथा विद्युत् अवरोधको समस्या तुरुन्त समाधान गर्न कार्यकारी निर्देशक हितेन्द्रदेव शाक्यसहितको टोली बिहीबार त्यहाँ पुगेको छ ।

वर्षौंदेखि प्राधिकरणअन्तर्गतका प्रसारण तथा वितरण पूर्वाधार संरचना मर्मत–सम्भार (काम चलाउ) अवस्थामा सञ्चालन गरिँदै आएको छ । दिगो र भरपर्दो विद्युत् आपूर्ति गर्न पूर्वाधार संरचनाको मर्मत–सम्भार, नयाँ जडानलगायत काम गर्ने र भविष्यमा यस्ता खालका दुर्घटना घट्न नदिने गरी अगाडि बढ्ने योजनाका साथ यसको अध्ययन गरिने भएको छ ।

ढल्केबर देशकै ठूलो सबस्टेसन हो । यहाँ ४०० देखि ११ केभी (४००/२२०/१३२/३३/११ केभी)सम्मका अलग–अलग सबस्टेसन छन् । बुधबार सबस्टेसनको १३२/३३/११ केभी खण्डमा मात्र समस्या आएको थियो । सबस्टेसनको पूरै खण्डमा कुनै समस्या नआएको ढल्केबर गिड महाशाखाका प्रमुख विनोद लोहनीले जानकारी दिए ।

निरीक्षणका क्रममा कार्यकारी निर्देशक शाक्यले आगामी दिनमा यस्ता प्राविधिक समस्या दोहोरिन नदिन निर्देशन दिए । अवरुद्ध भएको विद्युत् आपूर्ति व्यवस्थालाई तत्काल सुचारु गर्ने गरी वैकल्पिक माध्यमबाट विद्युत् आपूर्तिको लागि मधेस प्रदेश प्रादेशिक कार्यालयका प्रमुख शम्भु कुसियत यादवलाई निर्देशन दिए ।

सबस्टेसनमा जडित करेन्ट ट्रान्सफर्मर (सिटी) पड्केर बुधबार बिहान ७ः३० बजेदेखि धनुषाको जनकपुरधाम, यदुकुवा, धनुषाधाम, सखुवा, महोत्तरीको जलेश्वर, गौशाला, वर्दिबास, सिन्धुलीको भिमानलगायत क्षेत्रमा विद्युत् आपूर्तिमा समस्या आएको थियो । वैकल्पिक व्यवस्था गरी अधिकांश स्थानमा बुधबार नै विद्युत् आपूर्ति व्यवस्था गरिएको प्राधिकरणले जनाएको छ ।  

सबस्टेसनमा जडित ६३ एमभीए क्षमताका दुई पावर ट्रान्सफर्मरमा ०८१ भदौ १८ गते पनि समस्या आएको थियो । दुईवटा ट्रान्सफर्मरबाट करिब ९० एमभीए विद्युत् भार (लोड) आपूर्ति भइरहेकामा करिब तीन सातासम्म ३० एमभीएको लोड काटिएको थियो । त्यतिबेला प्रभावित क्षेत्रको आपूर्तिलाई नियमित गर्न भारतको सुरसण्डबाट ३३ केभी प्रसारण लाइनबाट विद्युत् आयात गरिएको थियो ।

ढल्केबरस्थित ४०० केभी सबस्टेसन नै नेपाल र भारतबीच विद्युत् आयात–निर्यातको एक मात्र संरचना हो । ढल्केबर–मुजफ्फरपुर अन्तरदेशीय प्रसारण लाइनमार्फत नेपालले हिउँदमा मागअनुसार आयात र बर्खामा विद्युत् निर्यात गर्दै आएको छ ।