काठमाडौं । आइतबार सल्यान कपुरकोट–५ खारखोलामा ना २ ख २५५२ नम्बरको बस दुर्घटनामा पर्‍यो । दुर्घटनामा १२ जनाले ज्यान गुमाए भने १९ जना घाइते भए । बस करिब दुईसय मिटर तल खसेको थियो ।

प्रहरीले तीव्र गतिका कारण बस दुर्घटना भएको प्रारम्भिक अनुमान गरेको छ । दुर्घटनालगत्तै चालक फरार भएका थिए । तर, उनी सोमबार (आज) दाङको तुलसीपुर प्रहरी कार्यालयमा आफैँ सम्पर्कमा आएका छन् । उनी सल्यानको शारदा नगरपालिका– ३ महिसेपानीका ३० वर्षीय सुदीप खान हुन् । 

जिल्ला प्रहरी कार्यालय सल्यानका डीएसपी गोविन्द थापाले चालककै लापरबाहीले दुर्घटना भएको बताए । ‘‘चालकको लापरबाहीले नै दुर्घटना भएको हो । चालकको बयान पछि सरकारी वकिल कहाँ गएपछि हुन्छ,” उनले भने, ‘‘अन्य अनुसन्धान भइरहेको छ ।” 

उनले चालकसँग बयान लिने तयारी भइरहेको जानकारी दिए । ‘‘चालक हामीकहाँ भर्खरै आइपुगे । बयान नभएर अनुमानका भरमा केही भन्न सकिँदैन । आधिकारिक कुरा बयानपछि मात्रै आउँछ,” डीएसपी थापाले भने । 

उनकाअनुसार केही घाइतेको कोहलपुर मेडिकल कलेजमा उपचार भइरहेको छ । केही घाइतेलाई उपचारका लागि काठमाडौं ल्याइएको छ । केही सामान्य अवस्था भएका घाइतेको उपचार सल्यानमै उपचार भइरहेको छ । 

कर्णाली प्रदेश प्रहरी कार्यालयका प्रवक्ता माधवप्रसाद श्रेष्ठकाअनुसार चालक र बस साहु पनि घाइते छन् । उनी पनि अहिलेसम्म तीव्र गतिकै कारण दुर्घटना भएको खुलेको बताउँछन् ।

तर, जिल्ला प्रशासन कार्यालय सल्यानले बस दुर्घटना भएको ठाउँको सडक जीर्ण रहेको जनाएको छ । प्रशासनकी प्रमुख जिल्ला अधिकारी लक्ष्मीदेवी होमागाई खतिवडाले सडकमा खाल्डाखुल्डी भएको जानकारी दिइन् । 

‘‘सडकमा खाल्डाखुल्डी छन् । जीर्ण सडक हो । तर, दुर्घटना हुने सडक भने होइन । राप्ती राजमार्गअन्तर्गत पहिले पिच गरिएको सडक हो । अहिले जीर्ण भएर सडकमा खाल्डाखुल्डी परेका छन्  । तर, प्रहरीले तीव्र गतिकै कारण दुर्घटना भएको बताएको छ,” प्रजिअ होमागाई खतिवडाले भनिन् ।

प्रदेश सरकार मौन 
कर्णाली प्रदेशका मुख्यमन्त्री जीवनबहादुर शाहीले आइतबार शोक वक्तव्य जारी गरेका छन् । उनले राजमार्ग, ग्रामीण क्षेत्रमा सञ्चालन हुने सवारीमा सिट क्षमताभन्दा बढी यात्रु राखे नराखेको चेकजाँच गर्न र चालक यातायातका साधनको नियमित अनुगमन गर्न निर्देशन दिएका छन् ।

यसबाहेक कर्णाली प्रदेश सरकारले अन्य कुनै निर्णय नगरेको मुख्यमन्त्रीका स्वकीय सचिव राजबहादुर रोकायाले जानकारी दिए ।