काठमाडौं । भारतीय अभिनेता सुशान्त सिंह राजपूत आजभोलि नासाको स्पेस एन्ड रकेट सेन्टरमा प्रशिक्षण लिइरहेका छन् । तर सुशान्तले अभिनय छाडेर वैज्ञानिक बन्ने कसरतमा भने लागेका होइनन् । उनी आफ्नो आगामी चलचित्र ‘चन्दा मामा दूर के’ का लागि तयारी गरिरहेका छन् । 

यो चलचित्रमा उनको भूमिका अन्तरिक्ष वैज्ञानिकको छ । इन्डियन एक्सप्रेसका अनुसार चलचित्र ‘साइन्स फिक्सन’ फिल्म हो । चलचित्रलाई सञ्जय पुरान सिंह चौहानले निर्देशन गरिरहेका छन् भने विकी राजनीले निर्माण गर्दैछन् ।

सुशान्तले नासामा आफ्नो प्रशिक्षणका क्रममा लिएका केही तस्बिर सोसल मिडियामा सार्वजनिक गरेका छन् । बलिउडमा प्रशिक्षणका लागि नासा पुग्ने हिन्दी सिनेमामा ‘चन्दा मामा दूर के’ पहिलो चलचित्र हो ।