काठमाडौं । गएको सेटेम्बरमा न्युजिल्यान्ड पाकिस्तनको टुरमा थियो । टी–ट्वान्टी क्रिकेट र एकदिवसीय क्रिकेट सिरिज खेल्न गएको न्युजिल्यान्ड सुरक्षा खतरा भएको भन्दै नखेली फर्कियो ।

त्यस घटनाको पाकिस्तान सरकार र पाकिस्तान क्रिकेट दुवैले दुःख व्यक्त गरे । मैदानमा पुगिसकेको टिम क्रिकेट नै नखेली फर्कंदा पाकिस्तानी क्रिकेटरले पनि निराशा जनाए ।

त्यसपछि अहिले दुबईमा न्युजिल्यान्डले आफ्नो पहिलो खेलमा पाकिस्तानलाई प्रतिस्पर्धीको रूपमा पाएको छ । आईसीसी टी–ट्वान्टी विश्वकप क्रिकेटको पहिलो खेलमा नै भारतलाई १० विकेटले हराएर उच्च मनोबलमा रहेको पाकिस्तानले दोस्रो खेलमा न्युजिल्यान्डसँग खेल्दै छ । न्युजिल्यान्डको भने यो पहिलो खेल हो ।

विश्वकप इतिहास हेर्दा पकिस्तान न्युजिल्यान्डभन्दा बलियो टोली हो । पहिलो खेल जितेको पाकिस्तान दोस्रो खेलमा सहज विजय आत्मसात् गर्न चाहन्छ ।

भारतविरुद्धको खेलपछि पाकिस्तानका कप्तान बाबर आजमले पाकिस्तानको लक्ष्य विश्वकप क्रिकेटको उपाधि भएकोले यो जितले बलियो वा कमजोर आँक्न नसक्ने बताएका थिए ।

न्युजिल्यान्ड प्रतियोगिताको पहिलो खेलमा नै पाकिस्तानलाई हराएर सुखद सुरुवात गर्ने योजनामा छ । अनुभवी ब्याटिङ लाइन र राम्रो बलिङ क्षमतामा केन विलियमसनको कप्तानीमा न्युजिल्यान्ड मैदान उत्रनेछ ।

सन् २०१९ को एकदिवसीय विश्वकप क्रिकेटको उपाधि जित्न नसकेको न्युजिल्यान्ड टी–ट्वान्टी विश्वकपको उपाधि उचाल्ने लक्ष्यमा छ । पाकिस्तान आईसीसी टी–ट्वान्टी वरीयताको तेस्रो र न्युजिल्यान्ड चौथो स्थानमा छ ।

टी–ट्वान्टी अन्तर्राष्ट्रिय क्रिकेटको इतिहास हेर्दा पाकिस्तान र न्युजिल्यान्डबीच भएका १४ खेलमा पाकिस्तानले १० खेल जितेको छ । टी–ट्वान्टी विश्वकपमा भने पाकिस्तान र न्युजिल्यान्डबीच पाँच खेल भएकामा पाकिस्तान तीन खेलमा विजयी भएको थियो । आजको खेल जितेमा पाकिस्तानको सेमिफाइनल प्रवेश सम्भावना केही सहज बन्नेछ ।

दुबईस्थित सारझा क्रिकेट स्टेडियममा हुने पाकिस्तान र न्युजिल्यान्डबीचको खेल नेपाली समयानुसार साँझ ७ः४५ बाट सुरु हुनेछ ।