काठमाडौं । नेपाली यू–१९ राष्ट्रिय महिला टिमकी कप्तान पूजा महताेले युवा विश्वकपमा आफ्नो टिम फरक छाप छोड्न तयार रहेको बताएकी छन् । विश्वकपमा निम्ति मलेसिया जाने नेपाली टिमको बिदाइ कार्यक्रममा कप्तान पुजाले यस्तो बताएकी हुन् ।

नेपाली टिमलाई शुक्रबार एक कार्यक्रमकाबीच नेपाल क्रिकेट संघ (क्यान)ले बिदाइ गरेको थियो । जसमा खेलकुदमन्त्री तेजुलाल चौधरी, क्यानका उपाध्यक्ष रोशन सिंह र सचिव पारस खड्कालगायत क्यान पदाधिकारीको उपस्थिति थियो ।

कार्यक्रममा कप्तान पूजाले आफू कप्तान भएकै कारण दबाब महसुस नगरेको समेत प्रतिकृया दिइन् । “तयारी एकदम राम्रो छ । मेरो लागि यो पहिलो र अन्तिम हो । क्यानबाट महिला टिमले पहिलोपटक विश्वकपमा छनोट भएको हो । हामी एकदमै उत्साहित छौँ । हाम्रो लागि यो विश्वकप एकदमै महत्त्वपूर्ण छ । वेस्ट इन्डिज, अमेरिका र अरु सबै देश पनि बलिया छन्,” पूजाले भनिन्, “खेलमा कन्सिस्टेन्ट महसुस गरिरहेको छु । मलाई अहिलेसम्म कप्तानी सम्हाल्दा चुनौती महसुस भएको छैन । हामीले सुरुदेखि नै महिला क्रिकेटका निम्ति इतिहास बनाएका छौँ । त्यसकारण टिमको आत्मविश्वास एकदम उच्च छ । हामी सुपर सिक्समा पुग्न छौँ । ब्याटिङ, बलिङ र फिल्डिङमा बलियो छौँ । विश्वकपमा हामी फरक छाप छोड्ने छौँ ।”