जनकपुरधाम । गत भदौ २३ गते साँझ, ६ बजेको थियो । घाम डुब्नै लागेको थियो । सडक सुनसान थियो । गाउँ पुग्नै लाग्दा सडकमा तीन जना किसोर उभिएको देखिन्, जनकनन्नदी गाउँपालिका ४ खजुरीकी १४ वर्षीया ममता कुमारी कामतले । साँझको टिउसन पढेर घरतर्फ जाँदै थिइन्, उनी । सुनसान सडकमा केटाहरु देखेपछि सडकको पेटी परिवर्तन गरी छिटो–छिटो हिड्न थालिन्, ममता । किसोरहरुले ममतालाई जिस्काए । केही जवाफ नदिएपछि अपशब्द बोल्न थाल्यो, ममता चुपचाप उनीहरुलाई उछिनेर जान खोजिन् । तर, भिलवा दास र कलेश्वर दासले ममताको बाटो छेके । 

संजय दास भने गाउँबाट कोही आउँदै छ कि भनेर हेर्दै थिए । बाटो छेकेर किसोरले उनको हात समाउन खोज्दै थियो । ममता एकछिन अक्क न बक्क भइन् । डरले उनको शरीर पसिना–पसिना भयो । गाउँतर्फबाट साइकलमा एकजना आउँदै थिए । त्यत्तिकैमा कलेश्वरले भने उनको हातमा एउटा पर्ची दिँदै फोन गर्न भने । पर्चीमा फोन नम्बर लेखिएको थियो । यो सबै कुरा ममताको बुबा सुरेश कामतले जाहेरी दिन तयार पारेको कागजातमा उल्लेख गरिएको छ ।

तयार पारिएको जाहेरी अनुसार फोनमा कुरा नगरे ज्यान मार्ने धम्की नै दिइएको थियो । “फोन गरी हामीसँग सम्पर्क गर्नू । नत्र भोलि तेरो टिउसन नेपालमा हुँदैन । अन्यत्र उठाई लान्छु,” ममतालाई दिएको धम्की जाहेरी पत्रमा उल्लेख गरिएको छ । त्यसपछि  ममताले त्यो दिन रुदै परिवारलाई घटनाबारे जानकारी गराएकी थिइन् । भोलिपल्ट ममताको नातामा दाइ पर्ने बलिराम कामतले पर्चीमा दिएको नम्बरमा फोन गरी सम्झाउन खोजे । तर, तन्नेरी उमेरका केटाहरुले उल्टै धम्की दिन घरमा आएको परिवारजनको आरोप छ । त्यो दिन पनि दुबै पक्षबीच विवाद भयो । ममताको बुबाले इलाका प्रहरी कार्यालय खजुरीलाई जानकारी गराए । इलाकाले यस्ता मुद्दा स्थानीय जनप्रतिनिधले टुङ्गो लगाउने भन्दै फर्कायो । उनको बुबा सुरेशले वडाध्यक्ष हरिचन्द्र कामतलाई पनि जानकारी गराए । 

भोलिपल्ट वडा कार्यालयमै पञ्चायत डाकियो । त्यतिबेला सम्म घटनालाई राजनीतिक रुप दिन सुरु भइसकेको थियो । पञ्चायतमा पीडक पक्षकै दबदबा थियो । हरेक आरोपको खण्डन उनीहरुले चर्काे स्वरमा दिए । दुबै पक्षबीच चर्का–चर्की हुन थाल्यो । आरोपित पक्षका रामउदगार दासले हो–हल्ला मच्चाए । कुटाकुट भयो । दुबै पक्षका मानिस घाइते पनि भए । 
 
करिब दश दिनपछि वडाध्यक्ष हरिचन्द्र कामतले ममताको बुबा सुरेशलाई पुनः प्रहरीमा उजुरी गर्न सुझाए । इलाका प्रहरी कार्यालय खजुरीका प्रहरी निरीक्षक रवि मैनालीसँग पुनः ममताको बुबाले न्यायको लागि अनुनय गरे । निरीक्षक मैनालीले ममतालाई बयानको लागि प्रहरीमा आउन भने । उनको बुबाले त्यो कुरा घरमा सुनाए । ममताले त्यो कुरा थाह पाएपछि मंगलबार २ बजे धानमा हाल्ने औषधि (विष) सेवन गरि आत्महत्या गरिन् । 

दुबै पक्षका नेताहरुले आरोप्रत्यारोप गर्न थालेपछि विवाद भएको वडाध्यक्ष हरिचन्द्र कामतले बताए । मिलापत्र हुने अवस्था नदेखेपछि प्रहरीमै पठाएको उनको भनाइ छ । घटनाबारे समयमा समाज र प्रहरी सम्बेदनशिल नहुँदा ममताले गलत बाटो रोजेको उनले औंल्याए । “धैर्यता कसैलाई छैन्, आवेग सबैलाई छ,” उनले भने, “आवेग र रिसको परिणाम हो यो ।” घटनाको सत्यतथ्य छानबीन गरी दोषीलाई कारवाही गर्न उनले प्रशासनलाई सुझाए ।
 
यता, प्रहरी निरीक्षक मैनालीले मुद्दा दर्ता गर्ने अधार नदेखिएपछि दर्ता नगरेको दाबी गरे । ममतालाई बयानका लागि प्रहरीमा बोलाउँदा नआएको उनले उनले बताए । तर, आरोपित व्यक्तिहरुलाई इलाका प्रहरी कार्यालयमा बोलाई बयान गर्दा दोष नदेखिएको हुनाले मुद्दा दर्ता नगरेको उनको भनाइ छ । मृतकका आफन्तले प्रहरीले घुस खाएर मुद्दा दर्ता नगरेको आरोप लगाएका छन् । प्रहरीले अनुसन्धानमा चासो नदेखाउँदा छोरीले ज्यान गुमाएको ममताको बुबा सुरेशको गुनासो छ ।