काठमाडौं । साविक विजेता टोली हेल्प नेपाल स्पोर्ट्स क्लब र गण्डकी प्रदेशले राष्ट्रिय महिला तथा पुरुष एनभीए क्लब भलिबल च्याम्पियनसिपको क्वार्टरफाइनलमा स्थान बनाएका छन् । 

मंगलबार त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा भएको खेलमा हेल्प नेपालले प्रदेश २ लाई ३–० को सोझो सेटमा हराएको थियो । लगातार दोस्रो जित निकालेको हेल्प नेपालले समूह ‘ए’मा ६ अंक जोडेको छ । लगातार दोस्रो हारसँगै प्रदेश २ प्रतियोगिताबाट बाहिरियो । प्रदेश २ ले अब समूहको अन्तिम खेल वाग्मती प्रदेशविरुद्ध खेल्नेछ । वाग्मती प्रदेश पनि दुई खेल हारेर प्रतियोगिताबाट बाहिरिसकेको छ । 

समूह ‘ए’बाट गलकोट स्पोटर््स क्लबले क्वार्टरफाइनलमा स्थान बनाइसकेको छ । गलकोट र हेल्प नेपालबीचको खेलले समूह ‘ए’ को विजेता र उपविजेता टुंगो लाग्नेछ ।  

भारतीय खेलाडीको साथ पाएकोे हेल्पले प्रदेश दुईलाई २५–२१, २५–१७, २५–१६  को सेटमा हराएको हो ।

आजै पुरुषतर्फको दोस्रो खेलमा गण्डकी प्रदेशले मणिमुकुन्द भलिबल क्लबलाई ३–२ को सेटमा हराउँदै क्वार्टरफाइनलमा स्थान बनाएको छ । समूह ‘बी’ को गण्डकीले मणिमुकुन्दलाई मणिमुकुन्द २६–२४, ३६–३४, १८–२५, २५–२७, १५–१३ को सेटमा हराएको हो । 

लगातार दोस्रो जितसँगै पाँच अंक जोडेको गण्डकीले क्वार्टरफाइनलमा स्थान पक्का गरेको हो । एक अंक जोडेको मणिमुकुन्द भने प्रतियोगिताबाट बाहिरिएको छ । 

समूह ‘बी’मा नेपाल पुलिस क्लबले ६ अंक जोडेको छ । समूहको अन्तिम खेलमा नेपाल पुलिस क्लबविरुद्ध खेल्ने छ । सोही खेलबाट समूह विजेताको टुंगो लाग्नेछ । मणिमुकुन्दले समूहको अन्तिम खेलमा दावाँली मिलन क्लबविरुद्ध खेल्नेछ । दुई खेल हारेको दावाँली मिलन अंकबिहीन छ । 

अहिले त्रिभुवन आर्मी र नयाँ बजार युवा क्लबबीच प्रतिस्पर्धा भइरहेको छ । समूह ‘सी’बाट त्रिभुवन आर्मी र नयाँबजारले क्वार्टरफाइनलमा स्थान बनाइसकेका छन् । आजकोे खेलले समूह विजेताको टुंगो लाग्नेछ । अन्तिम खेलमा एपीएफले ढोरपाटनविरुद्ध खेल्नेछ । समूह ‘डी’ बाट पनि एपीएफ र ढोरपाटन स्पोटर््स क्लबले क्वार्टरफाइनलमा स्थान बनाइसकेको छ । आजको खेलबाट समूह ‘डी’ को पनि समूह विजेता टुंगो लाग्नेछ । 

पुरुषतर्फ १४ टोलीलाई चार समूहमा विभाजन गरिएको छ । समूह ‘ए’ र ‘बी’ मा समान चार टोली छन् भने समूह ‘सी’ र ‘डी’ मा समान तीन टोली छन् । प्रत्येक समूहबाट दुई टोलीले क्वार्टरफाइनलमा स्थान बनाउने छन् ।