काठमाडौं । स्मृति क्षय हुने रोग अल्जाइमर्स एक दीर्घकालीन मानसिक स्वास्थ्य समस्या हो । यो रोग सामान्यतया ६५ वर्षको उमेरपछि लाग्ने स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार अल्जाइमर्स रोगको सुरुवाती अवस्थामा अधिकांश बिरामीले उपचारको आवश्यकता महसुस गर्दैनन् । सोही कारण पछि यसको असर धेरै जटिल हुन्छ ।

लक्षणहरू
१. मिति, समय तथा स्थानका सम्बन्धमा ज्ञान हराउँदै जानु ।
२. बारम्बार एउटै कुराहरू सोधिरहनु ।
३. स्वविवेक शक्ति क्षीण हुनु ।
४. आँखाले देखेका कुराहरू नचिन्नु ।
५. नियमित गरिरहने क्रियाकलाप गर्न अप्ठ्यारो हुनु ।
६. सामान्य समस्याहरू समाधान गर्न नसक्नु

सरकारले अल्जाइमर्स रोग लागेका नागरिकको उपचारका लागि एक लाख रुपैयाँ र नीति तथा कार्यक्रममार्फत थप मासिक पाँच हजार रुपैयाँ आर्थिक सहायता उपलब्ध गराउने व्यवस्था गरेको छ ।

अल्जाइमर्स भएका व्यक्तिहरूलाई कसरी सहयोग गर्न सकिन्छ ?
१. अल्जाइमर्स भएका व्यक्तिहरूको कुरालाई धैर्यपूर्वक सुन्ने ।
२. दैनिक गरिने कामकाजमा सहयोग पुर्‍याउने ।
३. आत्मनिर्भरता बढाउन आवश्यक सीपहरू सिकाउने ।
४. लड्ने तथा चोटपटक लाग्ने जोखिम न्यूनीकरण गर्न घरको वातावरण सुरक्षित बनाउने ।
५. स्मरण शक्ति बढाउने खालका अभ्यासहरू गराउने ।
६. बिरामीलाई हेरचाह गर्ने व्यक्तिलाई हेरचाह गर्न कठिनाइ भए सो व्यक्तिले थप सहयोग माग्ने ।