मुम्बई । गीतकार तथा पूर्व राज्य सांसद जावेद अख्तरले हालै एउटा टेलिभिजन च्यानललाई दिएको बयानले उनलाई विवादमा तानेको छ । शुक्रबार उनले भारतीय टेलिभिजन च्यानल एनडीटीभीमा बोल्दै हिन्दुवादी संगठन राष्ट्रिय स्वयम्सेवक संघ (आरएसएस) लाई तालिबानसँग तुलना गरेका थिए । त्यसपछि अख्तरको आलोचना हुन थालेको हो । 

जावेदले भनेका थिए, “जसरी तालिबानहरू इस्लामिक राज्य चाहन्छन्, यस्ता व्यक्तिहरू पनि छन् जो हिन्दु राष्ट्र चाहन्छन् । तालिबानहरू बर्बर छ र उसको कार्य निन्दनीय छ । तर, जसले आरएसएस, बजरंग दल र बीएचपीजस्ता संगठनलाई समर्थन गर्छ उनीहरू सबै उस्तै हुन् ।”

बीजेपीका नेता राम कदमले ट्विटमार्फत अख्तरको बयानको विरोध गर्दै उनले हात जोडेर माफी माग्नुपर्ने बताएका थिए । अख्तरले माफी नमागेसम्म भारतमा उनका चलचित्र नदेखाइनेसमेत बताए । 

“जावेद अख्तरले जबसम्म संघ र विश्व हिन्दु परिषद्का करोडौँ कार्यकर्ताहरूसँग हात जोडेर माफी माग्दैनन् तबसम्म उनी र उनको परिवारको कुनै पनि चलचित्र यो महाभारतीय भूमिमा देखाइने छैन,” उनले भनेका छन् ।

अझ उनले अख्तरविरुद्ध प्रहरीमा उजुरी दर्ता गराउनुपर्नेसमेत भनेका छन् । यता बीजेपी महाराष्ट्रमा कानुनी सल्लाहकार भनिएका आशुतोष दुबेले मुम्बई प्रहरीमा अख्तरविरुद्ध उजुरी समेत दिइसकेको बताइएको छ । 

तालिबान
तालिबान अफगानिस्तानमा कट्टर इस्लामिक समूह हो । जसले बलको प्रयोग गरेर अफगानिस्तानको सत्तामाथि कब्जा गरेको छ । तालिबानले यसअघि सन् १९९६ मा अफगानिस्तानको सत्तामाथि कब्जा जमाएको थियो । उनीहरूले अफगानिस्तानलाई इस्लामिक राज्य घोषणा गरिसकेका छन् । बीबीसीबाट ।