काठमाडौं । यातायात व्यवस्था विभागले सवारी लाइसेन्सका लागि आवेदन दिएका पुराना आवेदकहरूको परीक्षा भदौ २० गतेदेखि सञ्चालन गर्दैछ । दोस्रो लहरको कोरोना संक्रमणको जोखिम कम गर्न भन्दै सरकारले गत वैशाख १६ गतेदेखि देशव्यापी निषेधाज्ञा जारी गरेको थियो । त्यही क्रममा लाइसेन्स परीक्षा पनि रोकिएको थियो । अब विभागले वैशाख १६ अघि आवेदन दिएका आवेदकको परीक्षा सञ्चाल गर्न लागेको हो ।

विभागका प्रवक्ता डा. लोकनाथ भुसालले सुरुमा पुराना आवेदकले मात्र परीक्षा सञ्चालन गरिने बताए । 

‘‘विभागले करिब डेढ महिना अघिदेखि नै सबै किसिमका परीक्षा सञ्चालन गर्ने तयारी थालेको थियो तर सरकारले अनुमति नदिँदा  अन्योलमा थियौँ,” प्रवक्ता भुसालले भने, “अब सुरुमा पुराना आवेदकको परीक्षा लिनेछौँ । तत्काल नयाँ खुलाइने छैन ।”

विभागले सबै यातायात व्यवस्था कार्यालयहरूलाई स्वास्थ्य मापदण्ड पालना गरेर सवारीचालक अनुमतिपत्र लाइसेन्सका परीक्षा सञ्चालन गर्न भनी गत बिहीबार नै पत्राचार गरिसकेकाे छ । 

परीक्षाको पर्खाइमा छन् ६ लाख आवेदक 
विभागकाअनुसार लाइसेन्स परीक्षा दिने पुराना आवेदकमध्ये ६ लाख आवेदक परीक्षाको पर्खाइमा छन् । त्यसैले तत्काल नयाँ आवेदन खुलाउँदा विभागले धान्न नसक्ने भएकाले पुराना आवेदकको परीक्षा सञ्चालन गर्न लागिएको प्रवक्ता भुसालले बताए । 

“यसै त ६ लाख आवेदकले परीक्षा दिन पाएका छैनन् । फेरि नयाँ आवेदन खुलाउँदा विभागले धान्न सक्दैन । त्यसैले ६ लाख पुराना आवेदकमध्ये आधाजतिले परीक्षा दिइसकेपछि नयाँ आवेदन खुलाउन सकिनेछ,” प्रवक्ता भुसालले भने ।

‘स्मार्टकार्ड’ आउन अझै डेढ महिना लाग्ने 
कोरोना महामारीका कारण ‘स्मार्टकार्ड’ भनेको समयमा नआउँदा करिब सात लाख जनालाई स्मार्ट लाइसेन्स वितरण गर्न नसकिएको प्रवक्ता भुसालको भनाइ छ । 

‘‘विभिन्न समस्याका कारण विभागलाई चाहिएजति स्मार्टकार्ड खरिद गर्न सकिरहेका छैनौँ । १४ लाख स्मार्ट कार्डका लागि विभागले खरिद प्रक्रिया थालेको थियो । उक्त स्मार्ट कार्ड आउन डेढ महिनाजति लाग्छ,” उनले भने, ‘‘अबको करिब ८ महिनाजतिमा मात्रै सबै सेवाग्राहीलाई ‘स्मार्टकार्ड’ उपलब्ध गराउनसक्ने सम्भावना छ ।  ड्राइभिङ पेशा गर्न विदेश जाने नागरिक र अन्य नागरिक लगायत अत्यावश्यक परेका नागरिकलाई लाइसेन्स दिइरहेका छौँ । विभागसँग न्यून मात्रामा स्मार्टकार्ड छ ।”

यस्तो छ परीक्षा मापदण्ड 
सवारी लाइसेन्सको परीक्षामा एक सिफ्टमा बढीमा १०० जना परीक्षार्थीले परीक्षा दिन पाउनेछन् । स्वास्थ्य मापदण्ड अनिवार्य पालना गरी एउटा कक्षाकोठामा २५ जना परीक्षार्थी राख्न पाइनेछ । काठमाडौं उपत्यकाका १८ ओटा यातायात व्यवस्था विभाग कार्यालयबाटमा २० गतेदेखि परीक्षा सञ्चालन हुने छ । 

उपत्यकाबाहिरका जिल्लाको हकमा उपत्यकामा सञ्चालन भएको १५ दिनपछि मात्रै सवारी लाइसेन्सका परीक्षा सञ्चालन गरिनेछ । परीक्षार्थीले १५ मिनेट अगाडि नै परीक्षा केन्द्रमा उपस्थित हुनुपर्नेछ । यस्तै, परीक्षा केन्द्रमा भिड गर्न रोक लगाइएको छ ।

विभागकाअनुसार लिखित परीक्षा दिएर ट्रायल परीक्षा दिनेहरूका लागि पुरानै नियम लागु गरिनेछ । आवेदनमात्रै दिएर लिखित परीक्षाको पर्खाइमा बसेकालाई नयाँ नियम अनुसार परीक्षा लिइनेछ ।