काठमाडौं । अर्थ मन्त्रालयले सर्वोत्तम सिमेन्टको ओटीसी कारोबारको विवरण माग गरेको छ । 

साउन २१ गते नेप्सेलाई पत्राचार गर्दै मन्त्रालयले ३ दिनभित्र सर्वोत्तम सिमेन्टको ओटीसी कारोबारको विवरण पेश गर्न भनेको छ । 

“सर्वोत्तम सिमेन्टको नेप्सेमा भएको ओटीसी कारोबारका सम्बन्धमा उक्त कम्पनीले कहीले ओटीसी कारोबारको लागि निवेदन पेश गरेको हो, र नेप्सेबाट कहिले ओटीसी कारोबारको लागि स्वीकृत दिएको हो तथा सेयर खरिद बिक्रिको स्पस्ट विवरण खुलाई पत्र प्राप्त भएको ३ दिन यस महाशाखामा उपलब्ध गारइदिन आदेशाअनुसार अनुरोध छ,” अर्थ मन्त्रालयको वित्तीय क्षेत्र तथा संस्थान महाखाले नेप्सेलाई पठाएको पत्रमा उल्लेख छ । 

बुक बिल्डिङ विधिबाट धितोपत्रको सार्वजनिक निष्कासन गर्ने प्रक्रियामा रहेको सर्वोत्तम सिमेन्टको सेयर धितचोपत्र बोर्डका अध्यक्ष भिष्मराज ढुङ्गानाकी छोरीको नाम रहेको प्रमाणसहितका समाचार सार्वजनिक भएका थिए । 

सोही कम्पनीको सेयर नेप्सेका सीईओ चन्द्रसिंह साउदकी श्रीमती सुशिला कुमारी बोहोरा र धितोपत्र बोर्डकै सञ्चालक चन्द्रप्रसाद ढकालका भाई हेमाराज ढकालले पनि किनेका थिए । 

सार्वजनिक निष्कासनको प्रक्रियामा रहेको संगठित संस्थाको सेयर नियामक निकायका पदाधिकारीका परिवारले नै खरिद गरेपछि अहिले उनीहरुमाथि नैतिकताको प्रश्न उठेको छ । 

सोही प्रकरणमा धितोपत्र बोर्ड र नेप्सेलाई स्पस्टीकरण सोधेको मन्त्रालयले थप अध्ययन गर्न भन्दै ओटीसी कारोबारको विवरण माग गरेको छ । बोर्ड र नेप्सेबाट स्पस्टीकरण प्राप्त भएपछि थप अध्ययन भइरहेको अर्थमन्त्रालयका प्रवक्ता महेश आचार्य बताउँछन् ।