विराटगनगर । विराटनगर महानगरपालिकाका वडाहरुमा कोरोनाविरुद्धको खोप लगाउन सुरु गरिएको छ । महानगरपालिकाका १८ वटा वडाहरुमा आजदेखि खोप अभियान सुरु गरिएको हो ।

संघीय सरकारले पठाएको चिनियाँ खोप भेरोसेल ५५ वर्ष उमेरभन्दा माथिका नगरवासीलाई लगाउन थालिएको छ । महानगरका मेयर भीम पराजुलीले भने, “संक्रमणको जोखिमलाई मध्यनजर गरी भिड हुन नदिई अभियान सञ्चालन गर्ने गरी वडाहरुमा व्यवस्थापन मिलाइएको छ ।”

विराटनगर–१ का वडाध्यक्ष उद्धव अर्यालले वडाहरुमा तोकिएको खोप केन्द्रमा मापदण्डानुसारका व्यक्तिहरुलाई खोप लगाउने व्यवस्था मिलाइएको जानकारी दिए । “सकेसम्म भौतिक दूरी र संक्रमणको जोखिम नहुने गरी व्यवस्थापन गरेका छौँ,” उनले भने ।

महानगर क्षेत्रका फ्रन्टलाइनर, कर्मचारी, यातायात मजदुरलगायत प्राथमिकताप्राप्त समूहलाई वडामा खोप नदिइने बताइएको छ । उनीहरुले महानगरले सञ्चालन गरेको वीरेन्द्र सभागृह र कोसी अस्पतालस्थित केन्द्रमा गई खोप लगाउन सक्ने व्यवस्था मिलाइएको महानगरले जनाएको छ ।

वैदेशिक रोजगारीमा जाने व्यक्तिहरुले जिल्ला प्रशासन कार्यालयको सिफारिस लिएर जनस्वास्थ्य कार्यालयमा गई कोरोनाविरुद्धको जोन्सन एन्ड जोन्सन कम्पनीको अमेरिकी खोप लगाउन पाउनेछन् ।