काठमाडौं । गृहमन्त्री विष्णु पौडेलले विपत्मा परेकाको राहत, उद्धार र पुनःस्थापनामा सरकारले राजनीति नगर्ने बताएका छन् ।

आइतबार राष्ट्रियसभामा राष्ट्रियसभा सदस्यहरुले राखेको प्रश्नको जवाफ दिँदै गृहमन्त्री पौडेलले मनसुनजन्य विपत्मा परेकाको उद्धार, राहत र पुनःस्थापनामा सरकारले राजनीति नगर्ने स्पष्ट पारेका हुन् ।

राजनीतिका लागि अन्य कैयौँ एजेन्डाहरु भएको भन्दै उनले मानवीय प्रश्नमा सरकारले राजनीति नगर्ने स्पष्ट पारे । विपत् व्यवस्थापनका लागि संघ, प्रदेश र स्थानीय तीनै तहका सरकारबीच प्रभावकारी समन्वय भएको उनले बताए । विपत्मा परेकाहरुलाई राहत दिन चाहने व्यक्तिहरुले सम्बन्धित जिल्ला प्रशासन कार्यालयमार्फत वितरण गर्ने गरी एकद्वार प्रणाली लागु गरिएको उनले जानकारी दिए ।

“संघीय सरकारको तर्फबाट गर्नुपर्ने प्रयासहरु गरिरहेका छौँ र प्रादेशिक सरकार र स्थानीय तहसँगको समन्वयलाई पनि हामी प्रभावकारी रुपले अगाडि बढाएका छौँ । राहतमा, पुनःस्थापनामा राजनीति भयो कि भन्ने यहाँहरुले टिप्पणी गर्नुभएको छ । म स्पष्ट गर्न चाहन्छु, सरकार मानवीय प्रश्नमा राजनीति गर्न चाहँदैन । राजनीति गर्नका लागि हाम्रा सामुन्नेमा अरु धेरै एजेन्डाहरु छन् । मानवीय प्रश्नमा, राहत, उद्धारको प्रश्नमा, पुनःस्थापनाको प्रश्नमा, विपत् जोखिम न्यूनीकरण गर्ने प्रश्नमा सरकार राजनीति गर्दैन,” उनले भने ।

उनले बाढी प्रभावितको पुनःस्थापनको निम्ति बजेटको अभाव नहुने पनि बताए । डुबानको समस्या समाधान गर्नका लागि भारत सरकारसँग दुईपक्षीय संवाद गरेको उनको भनाइ छ ।

कुनै पनि भौतिक संरचनाका कारणले डुबानमा नपरोस् भन्नका लागि र नदी थुनिएर बस्ती डुबानमा नहोस् भन्नका लागि सरकारले हरसम्भव प्रयास गरेको उनले बताए । यस वर्षको मनसुनजन्य विपत्का कारण क्षतिग्रस्त घरहरुको पुनर्निर्माण र पुनःस्थापनाका लागि सरकारले बनाएको कार्यविधिअनुसारको रकम तत्काल दिनका लागि प्रक्रिया अगाडि बढाइएको उनले जानकारी दिए । त्यसअघि, बैठकमा उनले समसामयिक विषयमा जानकारी गराएका थिए ।

राष्ट्रियसभाको अर्को बैठक सोमबार दिउँसो १ बजेका लागि बोलाइएको छ ।